Aksioni për sigurinë ushqimore/ Shpërthen Braçe: Dështim i madh, të rregullohen këto politika

Në një intervistë të fundit, Erion Braçe theksoi se për 20 vjet nuk është arritur të sigurohet një sistem i besueshëm i sigurisë ushqimore në vend. Ai vuri në dukje se dështimi është i përgjithshëm, jo vetëm nga qeveria aktuale, por edhe nga të gjitha palët përgjegjëse gjatë këtyre viteve.

Braçe kritikoi operacionin e fundit për kontrollin e produkteve përfundimtare, si domatja apo djathi, duke vënë në dukje mungesën e kontrollit në burimet kryesore, si ushqimi për bagëtinë apo përdorimi i farave dhe pesticideve nga importi. Ai nënvizoi se mungesa e kontrollit në këto etapa krijon rreziqe për sigurinë e ushqimit që arrin tek konsumatori

Një nga rastet që Braçe e konsideroi shembull të dështimit ishte sekuestrimi i 33 mijë kilogramëve djathë në Divjakë, për mungesë të dokumentacionit për blerjen e qumështit nga fermerët, edhe pse cilësia e produktit nuk ishte vënë në dyshim. Ai u shpreh i indinjuar për këtë veprim, duke theksuar se nuk është çështje sigurie ushqimore, por problem administrativ dhe fiskal.

Braçe u shpreh se zgjidhja nuk mund të vijë vetëm nga operacione policore, por kërkon politika fiskale të qarta dhe disiplinë financiare në sektorin e bujqësisë dhe blegtorisë. Ai kujtoi përpjekjet e tij gjatë viteve për të ndryshuar skemat tatimore që stimulojnë informalitetin dhe penalizojnë prodhimin vendas, duke theksuar se pa rregulluar këto politika, çdo operacion i tillë do të dështojë.
Ai përmendi edhe një problem tjetër të madh: mungesën e kontrollit në përdorimin e qumështit dhe vajit të palmës në fabrikat përpunuese, si dhe mungesën e gjurmueshmërisë së këtyre lëndëve të para.

Braçe shprehu keqardhjen për situatën aktuale dhe tha shprehinisht që nuk do të bëhet ministër Bujqësie për shkak të kompleksitetit dhe mungesës së vullnetit real për ndryshim.