Al-Hilal prezanton Inzaghi-n e gabuar

Al-Hilal ka njoftuar emërimin e Simone Inzaghi-t si trajnerin e ri të tyre, me italianin që vjen pas periudhës së tij te Inter-i.

Inzaghi do të jetë trajner i Al-Hilal-it për dy vitet e ardhshme dhe ai do të debutojë kundër Real Madrid-it në Kupën e Botës për Klube, më vonë këtë qershor.

Njoftimi zyrtar i transferimit të trajnerit italian, i cili vjen pas një sezoni pa tituj me zikaltërit, u bë nga vetë klubi saudit me një shënim të publikuar në faqen e tij të internetit dhe jo vetëm.

Përveç deklaratës zyrtare, klubi saudit publikoi edhe një video njoftimi që tregon ish-trajnerin e Inter-it gati për aventurën e tij të re.

” Unë jam Simone Inzaghi, dhe sot fillon historia ime me Al Hilal”, thotë trajneri në video-prezantimin e tij.

Asgjë e çuditshme në sipërfaqe, përveç një detaji që nuk i shpëtoi vëmendjes së tifozëve në mediat sociale.

Videoja në fakt shoqërohet me muzikë triumfale kur në një moment dëgjohet “Inzaghi, Inzaghi, Inzaghi!”.

Audioja e postuar nga ekipi i ri i trajnerit është në fakt ajo e festimit të komentatorit në golin e dytë të Pippo Inzaghi-t (vëllai i Simone-s) në finalen e Champions League-s të vitit 2007 të Milan-it kundër Liverpool-it.