Alabar shet asetet në Bjellorusi, bashkohet me dhëndrin e Donald Trump në Ballkan

Zhvilluesi i pasurive të paluajtshme të Emirateve që qëndron pas rrokaqiellit të njohur të Dubait, Burj Khalifa, ka iniciuar shitjen e aseteve të pronave që ai zotëron në Bjellorusi, një vend i shënjestruar nga sanksionet perëndimore, sipas dy personave të njohur me këtë çështje, pasi ai do të bashkëpunojë me Jared Kushner në një investim të mundshëm në Serbi.

Mohamed Alabbar, manjati i pasurive të patundshme në Emiratet, ka arritur një marrëveshje paraprake për të shitur interesat e tij shumë miliardë dollarëshe në Minsk, kryeqyteti i Bjellorusisë, përmes mjetit të tij investues “Symphony Global Holdings”.

Largimi i zhvilluesit të Emirateve nga Bjellorusia vjen në mes të një bashkëpunimi të ri me Kushner, dhëndrin e ish-presidentit të SHBA-së, Donald Trump, për të rindërtuar një ndërtesë të selisë së ushtrisë jugosllave në Serbi në një kompleks rezidencial.

Lidhur me Serbinë, miliarderi emiratas tha se ai “i shikonte bashkëpunimet me Kushnerin pozitivisht” dhe ishte “shumë i emocionuar për më shumë zhvillime të nivelit të lartë në treg”, por nuk dha detaje se çfarë do të përfshinte partneriteti.

Një person i njohur me planet e Kushnerit në Serbi tha se Alabbar ishte i përfshirë në rizhvillimin si këshilltar dhe ishte shumë herët për të thënë nëse edhe Emiratet do të investonin në të. Personi nuk pranoi të komentonte mbi aktivitetet e Alabbar në Bjellorusi.

Reuters nuk mund të përcaktojë se kush ka propozuar të blejë interesat e Alabbar në zhvillimin e Minskut, i njohur si North Waterfront, as kushtet e marrëveshjes paraprake.

Ndërsa Minsku nuk është në luftë me Kievin, presidenti i Bjellorusisë Alexander Lukashenko ka lejuar trupat ruse të përdorin territorin e tij për të nisur sulmet ndaj Ukrainës. Shtetet e Bashkuara kanë miratuar një sërë sanksionesh kundër Bjellorusisë për ndihmën e luftës së Rusisë, duke i ndaluar qytetarët amerikanë të bëjnë biznes me Lukashenkon dhe disa anëtarë të rrethit të tij.

Lukashenko ishte i përfshirë personalisht në projektin North Waterfront, duke e nisur zhvillimin me një dekret të majit 2021 që bën thirrje për krijimin e një kompleksi të madh banimi përgjatë rezervuarëve të ujit në Minskun verior dhe duke i caktuar rolin kryesor një prej kompanive të Alabbar.

Një zëdhënës i Lukashenkos tha se marrëveshja paraprake e shitjes së Alabbar ishte “lajm për presidentin”.

Planet e Kushnerit për të investuar në Serbi u shfaqën në mes të marsit kur një ligjvënës i opozitës, Aleksandar Jovanoviç, publikoi dokumente që tregonin se autoritetet serbe kishin përgatitur terrenin për një partneritet të pasurive të paluajtshme me biznesmenin amerikan.

I pyetur nga Reuters muajin e kaluar nëse projekti i Beogradit ishte lehtësuar nga lidhjet që ai bëri gjatë kohës së tij si këshilltar i Trumpit në Shtëpinë e Bardhë, Kushner tha: “Askush nuk po më jep marrëveshje speciale”.