Alarmi i Rutte: Kina mund të tërheqë Rusinë në një konflikt me NATO-n nëse pushton Tajvanin

Nëse Kina sulmon Tajvanin, Pekini mund t’i kërkojë Moskës të hapë një front të dytë kundër shteteve të NATO-s, tha Sekretari i Përgjithshëm i NATO-s, Mark Rutte, në një intervistë me New York Times.
Frika e përshkallëzimit të ndërhyrjes ushtarake kineze në Tajvan është rritur ndjeshëm që kur Rusia nisi pushtimin e saj të plotë të Ukrainës në shkurt 2022.
Lufta ka shërbyer si një model i mundshëm se si Taipei dhe bashkësia ndërkombëtare mund të reagojnë nëse Pekini vendos të pushtojë.
“Po rritet gjithnjë e më shumë ndërgjegjësimi, dhe le të mos jemi naivë për këtë: Nëse Xi Jinping do të sulmonte Tajvanin, gjëja e parë që do të bënte do të ishte t’i telefononte partnerit të tij shumë më të vogël në këtë çështje, Vladimir Vladimirovich Putin, që ndodhet në Moskë, dhe t’i thoshte: ‘Hej, do ta bëj këtë, dhe kam nevojë që ti t’i mbash të zënë në Evropë duke sulmuar territorin e NATO-s’”, tha Rutte.
“Kjo është mënyra më e mundshme se si do të zhvillohen ngjarjet. Dhe për t’i parandaluar, duhet të bëjmë dy gjëra. E para, që NATO si një tërësi të jetë aq e fortë saqë rusët të mos guxojnë ta bëjnë këtë. Dhe e dyta, të punojmë së bashku me rajonin Indo-Paqësor – diçka që presidenti (Donald) Trump e ka promovuar shumë”, shtoi shefi i NATO-s.
Aleatët e NATO-s kanë përmendur forcimin ushtarak të Rusisë, fushatat e sabotimit dhe agresionin e vazhdueshëm kundër Ukrainës si arsye për të përshpejtuar investimet në mbrojtje.
Rutte më parë paralajmëroi se Rusia mund të rindërtojë kapacitetin e saj ushtarak për të kërcënuar territorin e NATO-s brenda pesë viteve, duke i nxitur anëtarët të veprojnë me urgjencë.