Ato janë 5/ Volejboll me asociacionin

Kosova ka marrë përsipër te themelojë Asociacionin dhe ndërkombëtarët presin që kjo punë të kryhet shpejt. Kryenegociatori i Kosovës në dialogun me Serbinë përmendi 5 kritere si “siguresa” për të cilat tha se ka pajtim në Bruksel, që kjo bashkësi komunash të mos jetë “Zajednicë”. Në Beograd e mohuan këtë. BE-ja s’i jep të drejtë asnjërës palë, por iu bën thirrje atyre që të mos e prishin zbatimin e marrëveshjes së fundit, që synohet të përfundojë deri në fund të vitit.

Shpejt pritet të bëhen konkretë hapat që Kosovës do t’i duhet t’i bëjë për themelimin e Asociacionit të komunave me shumicë serbe. Në Bruksel dhe në Washington më nuk kanë dyshime se kjo do të ndodhë.

Kryenegociatoriët Besnik Bislimi dhe Petar Petkoviq të martën zhvilluan një takim në Bruksel dhe zbatimi i marrëveshjes së fundit ishte temë kryesore.

Pas takimit Bislimi paralajmëroi prezantimin e një drafti për statutin e Asociacionit nga ekipi menaxhues.

Sipas Bislimit, do të jenë pesë kritere përmes të cilave do të shihet se a do të jetë i pranueshëm ai draft si bazë për diskutim. Ai tha se ato “janë pesë siguresa të mjaftueshme që tregojne se ky mekanizëm apo ky lloj  vetëmenaxhimi nuk ka asgjë nga ajo që ne e kemi quajtur Zajednica”.

Për këto kritere, zëvendëskryeministri tha se “ka një dakordim të plotë në Bruksel”.

Nga ana tjeter, Kryenegociatori serb, Petar Petkoviq reagoi shpejt duke thënë se Bislimi “po i sajon gjërat”.

“Një gënjeshtër e pastër e Bislimit! Në Bruksel nuk u përmend asnjë fjalë për “pesë kriteret për Asociacionin” për të cilat ai flet . Ata folën për Statutin e Asociacionit dhe Ekipin Menaxhues. Bislimi po i sajon sërish gjërat, duket se dëgjoi atë që donte, jo atë që thuhej”, shkroi Petkoviq në Twitter, duke theksuar se Asociacioni mund të bëhet “vetëm në përputhje me marrëveshjet nga viti 2013 dhe 2015”.

Në Bruksel nuk e kanë konfirmuar e as mohuar atë që e tha Bislimi. Por zëdhënësi kryesor për Politikë të Jashtme dhe Siguri i Bashkimit Europian, Peter Stano u shpreh se palët “duhet të shmangin çdo retorikë dhe veprime kundërproduktive/jokonstruktive që kanë potencial ta prishin zbatimin dhe ta rrezikojnë stabilitetin në terren”.

Kosova dhe Serbia janë pajtuar që deri më 18 prill te krijojnë një komitet të përbashkët, i cili do të monitorojë zbatimin e të gjitha dipozitave të marrëveshjes dhe do të udhëhiqet nga Bashkimi Europian.

Emisari i BE-së për dialogun, Miroslav Lajçak e ka pranuar se synojnë që zbatimi i marrëveshjes së arritur më 27 shkurt dhe 18 mars të përfundojë deri në fund të vitit.