Berisha nga arresti: SHBA e BE të heqin dorë nga Reforma në Drejtësi

Vetë nga ‘arresti shtëpiak’ ku po pret të gjykohet për aferën e privatizimit të ish kompleksit Partizani, dhe me aleatin e tij në ‘arrest me burg’ për lobimin amerikan dhe aferën Cez- Dia, kryetari i PD-së, Sali Berisha bëri publik nismën e re: Të zhbëjë këtë sistem drejtësie të cilin e akuzon si të dhe Metën për ‘korrupsion’, gjatë kohës që kanë qenë në qeverisje.
Madje ai i bëri apel BE-së dhe SHBA-së që të mos e mbështeste më këtë drejtësi dhe gjithashtu që të “angazhohet Komisioni i Venecias për rishqyrtimin tërësor të këtij sistemi”, i cili u votua në Parlament me shumicë votash edhe nga vetë deputetët e opozitës, më 2017.
“Drejtësia e re është një drejtësi e munguar për qytetarët shqiptarë. Është një degë ekzekutivi për narkoshtetin shqiptar. Ndaj PD i bën thirrje Parlamentit Europian, Komisionit Europian, vendeve partnere të heqin dorë nga çdo mbështetje e kësaj drejtësie të kriminalizuar, të kontrolluar në çdo qelizë të saj nga kreu i narkoshtetit Edi Rama dhe regjimi i tij.
Të angazhojnë Komisionin e Venecias për një rishqyrtim tërësor të këtij sistemi, në mënyrë që shqiptarëve t’u rikthehet e drejta themelore e një procesi ligjor të drejtë dhe drejtësia të nxirret nga kthetrat e politikës dhe të shndërrohet në një sistem të varur nga ligji”, tha Berisha.

Konferencën për median me video nga shtëpia e vijoi duke marrë në mbrojtje Ilir Metën

Sulmoi dhe kryeministrin Edi Rama për takimin me shpenzime luksi në SHBA me Diasporën, sikurse akuzoi edhe kreun e SPAK, Altin Dumani, duke e cilësuar si “më kriminel nga Nuredini”.

Berisha foli edhe për protestën e ditës së nesërme (29 Nëntor), ku konfirmoi se do të vijontë mosbindja civile në të gjithë vendin ndaj kësaj qeverie dhe “Ramës si armiku më i madh i shqiptarëve”.

Ish kryeministri u shpreh se “në atë protestë shqiptarët do luftojmë për interesat më jetike të çdo qytetari shqiptar kundër një regjimi të urryer shqiptar. Mosbindja civile për dinjitetin e çdo qytetari shqiptar”.

Berisha sulmoi edhe ish-ambasadoren Yuri Kim si “bashkëautore në grushtin e shtetit ndaj opozitës shqiptare për rastin ‘non grata”. I bëri thirrje edhe SHBA-ve që të hetojnë rolin e saj në proces dhe që DASH të ndërpresë çdo ndihmë për strukturat e inkriminuara të kontrolluara nga Rama.

“…Mua më vjen keq që ju citoni korrupto-ambasadoren Juri Kim, e cila, së pari duhet të jemi patriotë, një njeri që u serviri shqiptarëve barin si diktatori Enver hoxha, tregoi një përçmim racist ndaj qytetarëve shqiptarë. Ajo është bashkëautore në grushtin e shtetit që iu bë opozitës shqiptare në një rast mbi baza kryekëput korruptive. Besoj se për ju e çdo shqiptar, sot është bërë e qartë se shkaku madhor i shpalljes non-grata të Sali Berishës qëndronte në mbrojtjen nga ai të interesave kombëtare dhe denoncimit nga ai të korrupsionit të narkoqeveritarëve shqiptarë dhe diplomatëve të korruptuar ndërkombëtarë…

Unë i bëj thirrje me këtë rast Departamentit të Drejtësisë të SHBA të ndërmarrë një hetim për rolin e saj në këto procese. I bëj thirrje Departamentit të Drejtësisë së SHBA të ndërpresë çdo ndihmë për struktura të inkriminuara në çdo qelizë dhe të kontrolluara fund e krye nga Edi Rama dhe krimi i organizuar në Shqipëri”, tha ai.

I pyetur për rastet Meta-Kryemadhi dhe deklaratën për Monikën, ku përmendi faktin se ish-kryetarja e LSI duhet të tregonte për mbi 400 mijë dollarët, ai u shpreh duke u përgjigjur vetëm për të parin:

“Së pari për Ilir Metën theksoj se prita dhe brutaliteti i urdhëruar nga Edi Rama për arrestimin e Metës s’e gjeni dot as në analet e diktatorit hoxha. Së dyti nuk mbroj asnjë akt korruptiv, të asnjë njeriu. Por ua them unë këtu, por të mos paraqesësh dot asnjë fakt dhe ta kesh pasur Kastriot Ismailin 4 apo 6 vite në burg, të kesh përdorur të gjitha metodat për t’i marrë dëshmi kundër Metës dhe ai ka refuzuar, s’ka pohuar asgjë që s’janë të vërteta, cili është ai njeri kur personit që ky akuzohej i ishte ofruar lirimin e menjëhershëm nga mercenar Dumani, nëse do pohonte edhe gjënë më të vogël. E kuptoni ça turpi drejtësie është kjo? Apo të akuzosh Ilir Metën se ke porositur një shtëpi te një biznesmen dhe ke marrë përsipër për t’i votuar një ligj, ndërkohë që ke anuluar thotë, mercenar Dumani, blerjen e shtëpisë, por ligjin e ke kaluar, duhet të kesh atë fytyrë që kanë. Ligjet s’i kalon Meta me 20 deputetë, por Rama me 67 deputetë që kishte. Ligji për të cilin dumani pafytyrësisht akuzon Metën se u kalua, çfarë fytyre kanë këta njerëz. Nuk guxojnë të thërrasin Edi Ramën për të njëjtin ligj”, u shpreh ai.

Por nuk kurseu as sulmet e hapura ndaj Altin Dumanit:

“A e kuptoni se Altin Dumani është ndofta më kriminel se Nuredini! Sepse Nuredini ka kryer vrasje, por i ka pohuar, i ka rrëfyer, i ka treguar ato. Kurse Dumani është mashtrues ordiner, njeri që fsheh krime, që përdor krime për pengmarrje, që zbaton urdhra të atyre që e kanë marrë peng. Nuk mund të imagjinohen gjëra të tilla. Çdo politikan e qytetar duhet të qëndrojë me transparencë përballë kësaj drejtësie. Krahas Nuredinit duhet të ishte dhe Altini, me qëndrimin që mban ndaj krimit me dosjet që mbyll”.

Kurse i pyetur për së dyti për çështjen Kryemadhi ai tha shkurtimisht, duke iu shmangur një përgjigjeje direkte nëse ishte lapsus apo thirrje ndaj Kryemadhit për rrëfim:

“Zonja Kryemadhi është politikane që në rininë e saj. Çdo politikan duhet të qëndrojë transparent dhe të bëjë transparencë para të gjithash publikut. Përgjigje më të mirë s’mund të ketë, kur krahasova Nuredinin me Altinin. Aa sa të thuash se Monika të kthehet në të penduar të Altinit (Dumanit)!”.

Berisha theksoi më tej se bashkëpunimi me Partinë e Lirisë do vijojë, pasi janë aleatë opozitarë, kurse Ilir Metën e quajti “të burgosur politik”.

“Çoi bastardin e familjes Hoxha për ta arrestuar. Dy policë ka Shqipëria. Proda, eksponent i krimit, mbiemër të dytë ka Shullazin. Me të dhëna implikimi të thellë. Dhe më tej një nga specialistët më të mëdhenj të gjobëvënies, nga polici rrugor i gjobave, në ministër i Brendshëm”, tha ai.

Ish-kryeministri trajtoi edhe çështjen e vizitës së Ramës në SHBA, në takimin me Diasporën, ku e akuzoi për shpenzime luksi. Ai përshëndeti edhe protestën e disa mbështetësve kundër takimit të kryeministrit, teksa theksoi se “diaspora shqiptare në SHBA, me guximin e saj i rezervoi narkodikatorit ediskobar pritjen që meritonte”.

“Vetëm udhëtimin e fundit mund të ketë harxhuar edhe sa janë pensionet e mjera pensionisteve. Ku vetëm një karrige thuhet se kushtonte tre pensione e gjysmë. Pa llogaritur reklamat, që sipas burimeve kushtonte 150 dollarë për 15 sekonda dhe u mbajt në atë kullë 2 ose tre ditë. Shuma marramendëse, udhëtimet e zyrtarëve nga Tirana për të mbushur atë sallë, më e kushtueshmja. A s’e denoncoi ish-bashkëjetuesja e McGonigalit se darkoi në restorantet me të kushtueshme, 10 mijë dollarë darka”, tha Berisha.

Në fund ai bëri thirrje për protestën e nesërme 29 Tetor, duke thënë se “mosbindja civile ndaj narkoregjimit do të vazhdojë, diktatura të ardhme nuk ka, në datën 29 shqiptarët të gjithë në protestë”. “Protesta bëhet për dinjitetin e shqiptarëve ndaj këtij narkoshteti”, tha ish-kryeministri.