Berisha sfidon Qeverinë: 200 euro në muaj çdo shqiptari ose do kemi mjerim pa fund

Kreu i Partisë Demokratike, Sali Berisha, ka premtuar se çdo shqiptar do të marrë 200 euro në muaj. Sipas tij, ky program ka për qëllim të ndihmojë ata që jetojnë në varfëri të skajshme, duke siguruar një mbështetje minimale prej 6.3 euro në ditë për çdo individ, e cila, sipas Berishës, do t’i ndihmojë të dalin nga mjerimi.

Në fjalën e tij, Berisha kritikoi qeverinë aktuale për mosmiratimin e një ligji për pensionet dhe ndihmën për qytetarët e varfër. Ai gjithashtu thekson se Partia Demokratike ka një program të qartë dhe të mbështetur nga ekspertë shqiptarë dhe të huaj për të përmirësuar gjendjen e qytetarëve në nevojë.

Pjesë nga fjala e kreut të PD Sali Berisha:

Së pari ju falënderoj me mirënjohjen më të thellë për këtë pritje të zjarrtë dhe entuziaste.

Përshëndes secilin prej jush, përshëndes qytetarët e kësaj lagje.

Përshëndes kryetarin e PD, kandidatët tanë për deputetë dhe të gjithë të pranishmit këtu.

Të dashur miq, sot ne jemi në këtë takim për të diskutuar programin e PD me ju, me qëllim që ju këtë program ta diskutoni, ta paraqisni me çdo qytetar të kësaj lagje, por edhe me çdo të njohur tuajin kudo që ndodhet.

Në rast se ndalemi në këtë fushatë, ju konstatoni se ata që qeverisën 12 vite, ata prej 2 muajsh më së shumti paraqitën kopje të deformuar të programit tonë.

Dhe të tjerat pastaj një lloj përçmimi ndaj qytetarëve.

Se në rast se ti, kryeministër 12 vite, del para qytetarëve dhe u flet për zhaba, hardhuca, bretkosa, atyre që nuk blejnë dot ilaçet, atyre që nuk e mbyllin dot muajin me ushqime, atyre që të sëmurët në spitale i kanë pa mjekim, atyre që sado të ndajnë në sofër nuk u mjafton dhe për fëmijët e tyre dhe detyrohen t’u thonë ndiq rrugët e botës së këtu nuk na del.

Në qoftë se ti kryeministër, kur në janar paraqet buxhetin 8 miliardë, qindarkë për qindarkë djersë dhe taksë e juaja, dhe lë për 780 mijë pensionistë 16 milionë euro dhe u thua se po të rrisim pensionet apo po të vendosim minimumin jetik 200 euro, biem në humnerë. Refuzon votimin e ligjit me pashpirtësi dhe kur e sheh që njerëzit po të shohin me përçmim, kur e sheh që njerëzit po e kuptojnë se ty nuk ta ndjen për ta, atëherë del e mashtrim, kthehesh tek arma jote e vjetër e thua do bëj pensionin 200 euro, por në vitin 2030.

Miqtë e mi, ne vijmë para jush me një program, i cili iu garantoj se ka eksperiencën më të mirë të të shkuarës sonë, por ka edhe mendimin më të mirë të institucioneve dhe specialistëve jo vetëm shqiptarë, por edhe të huaj.

Ky program do nisë me urgjencë për të ndihmuar ata që janë më në nevojë.

Dhe ata që janë më në nevojë janë ata të cilët jetojnë në varfëri të skajshme.

Janë ata të cilët nuk e mbyllin dot muajin me tre vakte.

Janë ata të cilët janë identifikuar. Organizatat e fëmijëve dëshmojnë se 18 përqind e familjeve nuk u japin dot fëmijëve tre vakte. Po këto organizata thonë se 41 përqind e familjeve nuk u japin dot fëmijëve ushqimin e duhur.

Ju mund të takoni të moshuar që nuk blejnë ilaçet, që kanë vështirësi për ushqimin.

Atëherë ne kemi një ndërhyrje urgjente dhe kjo ndërhyrje urgjente është vendosja e minimumit jetik 200 euro.

Çdo shqiptar do marrë 200 euro, çka do të thotë se ai do ketë 6.3 euro në ditë. Me 6.3 euro në ditë del nga mjerimi, prapë varfëri ka, por mjerim jo.

Ky është standard ndërkombëtar, ky është standard real.