Burg për “deputetët që shpifin”, Bardhi: Propozimin e Bashës e ka zili edhe Rama

Kreu i Grupit të PD, Gazment Bardhi, në një intervistë televizive ka deklaruar se tashmë janë drejt bashkimit të opozitës në një koalicion të gjerë opozitar.

Bardhi ka komentuar po ashtu edhe masën e arrestit në shtëpi të Sali Berishës, duke e cilësuar si një masë të panevojshme, ndërsa ndërprerja e komunikimit me publikun sipas tij është tejkalim.  Sipas tij Prokuroria mund ta kishte hequr masën.

“Kemi lënë mënjanë konfliktin, në fokus bashkimi. Po punojmë për bashkimin në një formacion të opozitës dhe shumë shpejt do të kemi zhvillime sa i përket bashkimit”, është shprehur ai ndër të tjera.

“Ligji i PS për Komisionet Hetimore, mekanizëm i mazhorancës. I jam drejtuar me letër zyrtare Presidentit Begaj. Presidenti të ngrihet në lartësinë e përfaqësuesit të popullit”, tha ai.

Kreu i Partisë Demokratike, Lulzim Basha ka propozuar një projektligj në Parlament për të dënuar me burg shpifjen.  Bardha tha se një propozim të tillë do e kishte zili Edi Rama. Gjatë intervistës, Bardhi tha se Basha është dënuar më shumë për shpifje.

Bardhi: Në parantezë unë nuk kam bërë asnjë akuzë, kam thënë një të vërtetë dhe besoj jeni njohur edhe me dokumentacionin ligjor që e vërteton këtë gjë. Deputeti nuk ka imunitet nga shpifja. Pra nëse një deputet bën një shpifje ai mund të çohet në gjykatë, qoftë në një proces civil apo penal. Deri në vitin 2012, shpifja në Kodin tonë Penal ka qenë dënim me burg dhe ka qenë një kërkesë e BE-së që të dekriminalizohej vepra penale e shpifjes, pra të mos kishte dënim me burg. Prej vitesh, OSBE-ODIHR, kryesisht ODIHR bën thirrje për dekriminalizimin total të shpifjes. E shikoj këtë lëvizje të zt. Basha si një lëvizje dëshpëruese për t’i mbyllur gojën deputetëve të opozitës që denoncojnë aferat e qeverisë.

Këtë ligj do ta kishte zili dhe do të donte ta propozonte Edi Rama. E ka propozuar kolegu Basha, nuk e di me çfarë motivi apo logjike duhet të dënohet deputetët që denoncojnë Edi Ramën. Por zt.Basha duhet të jetë një nga deputetët që është dënuar më shumë si shpifje dhe nëse do të zbatohej ky ligj sot do të ishte jo vetëm pa mandat deputeti, por duhet të ishte edhe në burg. Është një nga deputetët që është dënuar më shumë. Vetëm Taulant Balla mund të ketë fituar tre apo katër gjyqe për shpifje. Nëse do të ishte kjo dispozitë, sot Lulzim Basha duhet të ishte në burg se ka shpifur për Taulant Ballën se ka thënë është i lidhur me krimin. Në fakt nuk ka shpifur, kjo është e vërtetë e madhe. Ne nuk jemi oficerë të policisë gjyqësore. Zt. Basha dëshiron t’i kthejë në oficerë të Policisë Gjyqësore./ balkanweb