Chelsea kualifikohet me Brojën në fushë, Newcastle eliminon Man. City-n nga Kupa e Ligës

Kupa e Ligës në Angli (EFL Cup) zhvilloi ndeshjet e raundit të 1/16. Pas përfundimit të tyre kishte shumë surpriza, me Newcastle që eliminoi nga Kupa kampionët e Manchester City-t. Më tej kaluan ekipe si Liverpool, Arsenal, Fulham, West Ham apo edhe Everton. Në stadiumin “Saint James Park”, Newcastle iu fal golit të Isak në minutën e 53-të të ndeshjes, për të kaluar më tej në Kupën e Ligës. Bardhezinjtë mundën minimalisht 1-0 Manchester City-n, duke eliminuar kampionët në fuqi të Anglisë nga ky turne i rëndësishëm dhe zbehur ëndrrën e Guardiolës për fitimin e katër trofeve sezonalë.

Nga ana tjetër, Liverpooli fitoi 3-1 kundër Leicester në “Anfield Road”, me të kuqtë që kalojnë në raundin e radhës. Golat për djemtë e Klopp u shënuan nga Gakpo, Szoboszlai dhe Diego Jota, duke përmbysur avantazhin momental të “Dhelprave” me McAtter në minutën e dytë.