Dëmet që Edi Rama i shkaktoi Kosovës, sipas profesor Enver Bytyçit

Nga Enver Bytyçi

Hapat që ka bërë Kosova për de-përshkallëzimin e situatës në veri të vendit, nuk po konsiderohen si të mjaftueshme nga Bashkimi Europian për të hequr masat ndëshkuese të vendosura që prej qershorit, pasi sipas tyre, Kosova ka ende punë për të bërë në këtë drejtim.

Kryeministri Albin Kurti është treguar mjaft bashkëpunues dhe i gatshëm për të arritur marrëveshjen për normalizimin e marrëdhënieve me Serbinë, kurse masat ndëshkuese vazhdojnë të jenë prezente.

Dr. Enver Bytyçi, profesor në marrëdhëniet ndërkombëtare, ka thënë se sanksionet kundër Kosovës i ngriti për herë të parë kryeministri i Shqipërisë, Edi Rama. Sipas profesorit, BE-ja i vuri sanksione, Kosovës ndonëse është shteti më proevropian në botë.

Ai tha se kjo është e mjaftueshme për të parë së paku se sa shumë ka investuar Serbia kundër Kosovës.

“Ndërkaq Serbia nuk u sanksionua dhe nuk bëhet fjalë për tu sanksionuar për shkeljen e vendimit europian për vendosjen e sanksioneve kundër Rusisë. Serbia nuk u sanksionua edhe pse ajo sponsorizoi dhe organizoi agresion e akt terrorizmi kundër Kosovës më 24 shtator. Beogradit nuk i vunë sanksione as për qendrën ruse të diversionit në Evropë e në rajon të vendosur në Nish! As për shumë qendra të tjera të spiunazhit rus në Serbi. Nuk i vunë sanksione gjithashtu Serbisë kur nënshkroi marrëveshje me Rusinë për bashkërendimin e politikave të jashtme. Asaj iu vunë re pse e bëri këtë hap, kur Serbia si vend me negociata të hapura për integrim në BE do të duhej të zbatonte parimet evropiane në politikën e saj të jashtme dhe jo parimet ruse të kësaj politike.

Nuk iu vunë sanksione Serbisë edhe kur ajo rinovoi marrëveshjen me Vladimir Putin për të marrë gazin rus me çmime favorizuese, të cilat varen si kushtëzime të Beogradit ndaj Moskës. I vunë sanksione ose masa shtrëngimi viktimës, vendit më pro-evropian në Evropë. Ia vunë këto masa Kosovës, popullsia e secilës është më evropiane se vetë evropianet. Kjo është e mjaftueshme për të parë së paku se sa shumë ka investuar Serbia kundër Kosovës” – nënvizoi Bytyçi, duke theksuar edhe se këto sanksione Kosova i ka “dhuratë” prej Edi Ramës, prandaj edhe nuk duhet të pranojë asnjëlloj bashkëpunimi me të.

“Sot këto sanksione nuk hiqen. Sepse duhet konsensus europian. Kishte konsensus për ti vënë ato. Por nuk ka consensus për ti hequr. Ai që vendosi i pari, para evropianeve këto sanksione, pra kryeministri I Shqipërisë, I cili është shumë I zënë me punët e Italisë, Serbisë, Greqisë dhe vendeve të tjera. Shqipëria, Kosova e shqiptaria janë kostum i ngushtë për Edi Ramën. Duhet të zgjatet deri në Romë, Beograd, Athinë e pse jo edhe më tej, për të dëshmuar aftësinë e tij të paparë. Kosova është thjesht një zar për të. Një zar me të cilën ai dëshmon besnikërinë e tij ndaj Aleksandër Vuçiç. Këto sanksione Kosova më së shumti I ka peshqesh prej Edi Ramës, I cili anuloi edhe mbledhjen e përbashkët të qeverive për ti thënë Evropës se “Edhe ju mund ta izoloni Kosovën pas meje”! Ishte nxitje e evropianëve për vënien e atyre sanksioneve. Prandaj qeveria Kurti nuk duhet të pranojë asnjë lidhje, kontakt e bashkëpunim me Edi Ramën, derisa të hiqen këto sanksione kundër Kosovës” – potencoi professor Bytyci, duke shtuar se Albin Kurti nuk duhet të tërhiqet nga kërkesa për nënshkrimin e marrëveshjes nga ana e Vuçiç, derisa të hiqen këto sanksione.

“Që ta kuptoj edhe ambasadori amerikan, Hovenier pse kryeministri Kurti kërkon nënshkrim nga ana e Beogradit të marrëveshjes së Brukselit dhe aneksit të Ohrit. Sepse dje thoshte se nuk e kuptonte këtë gjest. Hovenier është mik i madh I Kosovës. Po ashtu vendi I tij, SHBA-të. Por ai duhet ta inkurajojë Kurtin të këmbëngulë në nënshkrimin e Vuçiç të marrëveshjes edhe si presion ndaj BE-së për heqjen e sanksioneve. Derisa këto sanksione i sajuan kundërshtarët e Kosovës dhe miqtë e Serbisë, ata duhen vënë nën presion për heqjen e tyre. Me vullnet të lirë nuk kanë për ta bërë këtë. Ka një përvojë të hidhur tashmë. Franca bllokoi liberalizimin e vizave për së paku pesë vite, se ashtu ia donte prapanica. Tani sërishmi nuk do që të hiqen sanksionet. Atëherë duhet bërë presion me sanksionimin e miqve të Francës, përkatësisht Aleksandër Vuçiç dhe Serbisë” – deklaroi profesor Enver Bytyçi.