Dëmi i Zajednicës, EKLIPSON çdo përfitim nga anëtarësimi në KiE

Mosgatishmëria e Qeverisë së Kosovës për të dërguar statutin e Asociacionit të Komunave me Shumicë Serbe për shqyrtim në Gjykatën Kushtetuese, ka bërë që Franca, Gjermania dhe Italia të kërkojnë shtyrjen e vendimit për pranimin e Kosovës në Këshillin e Evropës, kurse njohësit e çështjeve politike vlerësojnë se duhet “mobilizim” i institucioneve para mbledhjes së Këshillit të Ministrave që do mbahet këtë muaj në Strasburg.

Për ish-zëvendësministrin e Punëve të Jashtme të Kosovës, Valon Murtezaj, tani profesor i diplomacisë dhe marrëdhënieve ndërkombëtare në Paris, hezitimi i disa vendeve evropiane ka të bëjë me një lloj “mosbesimi” se çfarë do të ndodh me zbatimin e Asociacionit pas anëtarësimit eventual të Kosovës ne Këshillin e Evropës.

Sipas tij, ajo çfarë duhet të bëjë qeveria e Kosovës është të ‘intensifikojë në maksimum” komunikimin me Francën, Gjermaninë dhe Italinë, deri në ditën e fundit, dhe të ofrojë evidenca të garancive që mund të kërkohen.

Ndërkaq në sytë e studiuesit dhe sociologut kosovar, Shkodran Ramadani, kryeministri Albin Kurti, e kupton mirë gabimin që e ka bërë, meqë është zotuar “për Autonomi të serbëve në këmbim të Këshillit të Evropës”, dhe sipas tij, kryqeveritari tani po mundohet të zvarritë procesin dhe po shpreson “në ndonjë mrekulli”.

Madje sipas tij, “hendeku për Kosovën” sa do të vijë e do të ngushtohet dhe fushëveprimi do të zvogëlohet dhe se do të ketë gjithnjë e më pak mundësi të manovrohet.

Në debatit që u zhvillua brenda Asamblesë Parlamentare të KiE-së, ku kundërshtimet e përfaqësuesve serbë ishin të ashpra, njëra nga ato që u përballë dhe që ngriti fuqishëm zërin pro Kosovës, duke argumentuar se pse Prishtina duhet të anëtarësohet në këtë organizatë ishte pikërisht deputetja e BDI-së, Arta Bilalli.

Sipas saj, disponimi i deputetëve gjerman dhe francez, gjatë Asamblesë Parlamentare të Këshillit të Evropës ka qenë pozitiv për anëtarësimin e Kosovës, dhe ka shtuar se politika ndërkombëtare ndonjëherë reflekton edhe zhvillimet të cilat nuk janë thjeshtë “bardhë e zi”.

Të hënën, NTV.AL ka raportuar se vendet e QUINT-it i kanë kërkuar kryeministrit Kurti që të bëjë përparime në çështjen e Asociacionit duke e dërguar statutin për shqyrtim në Kushtetuese.

Duke marrë parasysh faktin se përkundër zotimeve Qeveria nuk ka bërë asnjë hap në këtë drejtim, Franca ka bërë një demarsh te vendet anëtare të KiE-së, duke kërkuar shtyrjen e vendimit për Kosovën.

Vlen të theksohet se këtë qasje nuk e ka mbështetur Mbretëria e Bashkuar, sipas së cilës, çështja e Asociacionit si produkt i bisedimeve të Brukselit nuk duhet të ngatërrohet me çështjen e anëtarësimit në KiE.