Deputeti gjerman: Vuçiçit duhet t’i mbyllet “çezma” nga rrjedhin paratë e BE

Deputeti nga radhët e Partisë Socialdemokrate në Bundestag, Josip Juratoviç, në një prononcim për rrjetin ballkanik të lajmeve “N1″, programi në gjuhën serbe, ka thënë se regjimet autokratike në Ballkanin Perëndimor nuk duhet të mbështeten financiarisht nga Bashkimi Evropian teksa ka komentuar hapat që, sipas tij, duhet të ndërmerren ndaj Serbisë dhe regjimit të presidentit serb, Aleksandër Vuçiç, për të cilin edhe ka shtuar se “luan një rol tmerrësisht negativ” në zhvillimet politike në rajon, veçanërisht pas agresionit të paprovokuar rus në Ukrainë.

“Unë jam i mendimit se çezma duhet të mbyllet në ato vende dhe në ato raste kur shkelen rregullat demokratike të lojës. Vuçiçi është përfaqësues i një shteti që askush nuk i beson më dhe kjo është gjëja më e keqe që mund t’i ndodhë një vendi”, ka theksuar Juratoviç

Kur është pyetur për shkrimet e medieve gjermane mbi rolin destruktriv të regjimit serb në Kosovë, Mal të Zi dhe Bosnje-Hercegovinë, deputeti gjerman ka potencuar se tashmë është mëse e qartë që Vuçiçi luan një rol shumë negativ në rajon, ndërsa ka shtuar se për këtë aryse, ekziston edhe rreziku i krizave të mëtejme.

Gazetat më të respektuara gjermane kanë shkruar së fundmi se presidenti serb posedon të gjitha parametrat për të qenë “zjarrvënësi i rajonit” dhe kanë fajësuar bashkësine e organizuar ndërkombëtare për qasjen e tyre të butë ndaj tij, i cili ndërkohë ruan e kultivon marrëdhënie të mira me Rusinë dhe Kinën.