Dialogu Kosovë-Serbi/ Tani fillon malorja

Propozimi i Bashkimit Evropian për normalizimin e marrëdhënieve Kosovë-Serbi, i cili u bë publik pas takimit të fundit në Bruksel, parasheh krijimin e një komiteti të përbashkët, të kryesuar nga BE-ja, për monitorimin e zbatimit të kësaj marrëveshjeje. Politologë e juristë thonë se ky mekanizëm mund të përbëhet nga përfaqësues të Qeverisë së Kosovës dhe Serbisë, me qëllim arritjen e sa më shumë rezultateve në praktikë.

Ndonëse e diskutuan gjatë, të hënën e 27 shkurtit, kryeministri Albin Kurti dhe presidenti i Serbisë, Aleksandër Vuçiç, nuk e nënshkruan propozimin e BE-së, një marrëveshje e përbërë nga 11 nene, udhërrëfyesi i së cilës mund të nënshkruhen gjatë marsit.

Duke folur për krijimin e mekanizmit të monitorimit, profesori i shkencave politike, Bekim Baliqi, tha se po kalohet në fazën e çështjeve teknike të marrëveshjes dhe kjo ndoshta mund të jetë faza më e vështirë, sepse “nuk mjafton të themi një fotografim apo edhe pajtimi në parim, por janë detajet ato që përcaktojnë tempin dhe rezultatin e përgjithshëm të kësaj marrëveshjeje”

“Po sa do të ketë sukses? Kjo varet nga ajo se sa BE-ja dhe SHBA-ja do të jenë këmbëngulëse të kërkojnë rezultate, dhe në njëfarë mënyre të obligojnë dhe shtyjnë si Kosovën po ashtu edhe Serbinë për të përmbushur obligimet që kanë nga marrëveshjet e deritanishme, në mënyrë që më pas ta kenë më të lehtë të kërkojnë llogari” – theksoi  profesori i shkencave politike, Bekim Baliqi