Kosova

Dialogun Kosovë-Serbi/ Ish-presidenti slloven kusht BE: Nëse më përzgjedh si ndërmjetës do të…

Ish-presidenti slloven Borut Pahor, i cili po synon pozitën që do ta lërë emisari Miroslav Lajçak në gusht, ka treguar pikëpamjen e tij se dialogu “ka ngecur për shkak të mungesës së besimit” dhe tha se ai ofron planin e tij për ta rikthyer besimin e tij.

I pyetur nga Kosovo Online se çfarë do të ndryshojë në dialog në rast se merr pozitën e synuar dhe ku e sheh zgjidhjen, Pahor është përgjigjur se nuk mund ta thotë këtë tani, por se është i interesuar për postin e të dërguarit special të BE-së.

“Nuk mund ta them këtë tani, derisa të fillojë procesi. Unë kam vendosur të shkoj në atë proces dhe pastaj, nëse e pranojnë atë vendim, do të them dhe do të ofroj të gjitha referencat e mia, do të jap planin tim. Dialogu është në ngërç, ka mungesë besimi dhe ne duhet të gjejmë një mënyrë për të ecur përpara me besim më të madh”, tha Pahor.

Ai theksoi se pa progres në dialog, as Kosova e as Serbia nuk mund të arrijnë asgjë për një të ardhme më të sigurt. I pyetur nëse është e mundur që i gjithë Ballkani Perëndimor të jetë në BE në vitin 2030, ai pranon se ndoshta nuk është e mundur, por pa optimizëm as 2050 nuk do të jetë as një vit realist.

“Optimizmi ka ekzistuar në vitin 2004, nuk ekziston sot. Prezantimi im në takim, kur thashë për vitin 2030, nuk u prit me duartrokitje, sepse askush nuk beson se as BE-ja dhe as vendet e rajonit nuk do të jenë gati në 2030. Por, nëse vazhdojmë kështu, atëherë rajoni nuk do të jetë në BE as në vitin 2050. Dhe koha po ikën”, tha Pahor në Lubjanë, ku Instituti i tij “Miqtë e Ballkanit Perëndimor” organizoi një konferencë për të ardhmen e Ballkanit Perëndimor në BE.

Për shkak të të gjitha sfidave gjeopolitike, si lufta në Ukrainë dhe konflikti në Lindjen e Mesme, paqja duhet të ruhet, tha ai.

“Le të mos bëjmë shaka. Ne jemi përgjigjka për ruajtjen e paqes, stabilitetit dhe mirëqenies së njerëzve në këtë pjesë të Europës. Vetëm zgjerimi i Bashkimit Europian është një garanci e qëndrueshme e paqes dhe sigurisë”, përfundoi Pahor./Express/

Kosova

E pazakontë/ Polici e ndaloi, shoferja e përplas dhe largohet nga vendi i ngjarjes

Një ngjarje e paprecedentë ka ndodhur mbrëmjen e sotme në Prishtinë, ku një grua që ishte ndaluar nga polici për kundravajtje rrugore, ka përplasur me makinë efektivin dhe më pas është larguar nga vendngjarja.

Efektivi është dërguar për trajtim mjekësor në spitalin e Prishtinës ndërsa policia është vënë në kërkim të shoferes që u largua nga vendngjarja.

“Sot rreth orës 19:00, në rrugën Prishtinë -Fushë Kosovë, një zyrtar policor, i cili ishte në detyrë, është goditur nga një person i dyshuar me automjet. E dyshuara femër, A.A, është ndalur nga policia për një kundërvajtje trafiku. E njëjta duke mos përfillë urdhërat e zyrtarit policor, për të dalë nga automjeti i cili duhej të konfiskohej, pasi ka goditur me automjet zyrtarin policor është larguar nga vendi i ngjarjes”- thuhet në njoftimin e policisë.

Kosova

Kritika për pushtetin dhe mbështetje për lirinë e mediave në Kosovë/ Osmani: Këtë betejë duhet ta bëjmë bashkë

Presidentja e Kosovës, Vjosa Osmani ka shprehur mbështetjen për gazetarët dhe për mbrojtjen e të drejtës së tyre për të raportuar pa frikë e pa censurë, në Ditën Botërore të Lirisë së Shtypit. Ndërkaq, partitë opozitare kanë kritikuar Qeverinë për sulm ndaj mediave.

Reagimet e tyre vijnë pas publikimit të Indeksit për Liri të Shtypit nga organizata joqeveritare, Reporterët pa Kufij, ku Kosova u rendit në vendin e 75-të, apo 19 vende më poshtë sesa vitin paraprak.

Presidentja e Kosovës, Vjosa Osmani, tha se liria e shtypit është thelbësore për demokracinë dhe të vërtetën. Megjithatë, ajo shprehu shqetësim për lajmet e rreme dhe dezinformatat dhe tha se luftimi i tyre “nuk ka qenë kurrë më urgjente”.

“Këtë betejë duhet ta bëjmë bashkë, institucionet, gazetarët dhe shoqëria civile, ngase vetëm bashkërisht mund ta mirëmbajmë një ambient ku e vërteta mbizotëron ndaj lajmeve të rreme dhe ku media është e lirë ta përmbushë rolin e saj si mbrojtëse e demokracisë dhe e të drejtës së qytetarëve për të qenë të mirinformuar”, tha Osmani përmes një deklarate për media.

Për gjendjen e lirisë së mediave kanë reaguar edhe partitë opozitare shqiptare në Kuvendin e Kosovës, të cilët kanë kritikuar pushtetin për sulm të mediave.

Kreu i subjektit më të madh opozitar, Partisë Demokratike të Kosovës, Memli Krasniqi, tha se historikisht punëtorët medial kanë “mirëmbajtur standarde, integritetit dhe guxim të lartë edhe në kohërat më të errëta të vendit tonë”.

“Prandaj, zhvillimet e fundit në Kosovë, megjithëse në liri, paraqesin një pamje dhe një situatë tejet shqetësuese për median e lirë”, shkroi ai në Facebook.

Duke folur për kthimin prapa që ka bërë Kosova në Indeksin e Reporterëve pa Kufij, Krasniqi tha se “presioni në rritje i Qeverisë ndaj mediave të pavarura dhe shënjestrimi i gazetarëve të vendit tonë është kërcënim në rritje për lirinë e shtypit dhe fjalës së lirë”.

Reporterët pa Kufij thanë se mediat në Kosovë, pavarësisht se vazhdojnë t’i mbajnë përgjegjës politikanët, gazetarët vazhdojnë të jenë “cak i sulmeve politike”.

“I bëj thirrje Qeverisë që të ndërpresë cenimin dhe përndjekjen e gazetarëve dhe mediave të lira të vendit tonë. Gazetarët duhet të vazhdojnë të punojnë pa frikën e hakmarrjes, censurës ose persekutimit”, tha Krasniqi.
Edhe Lidhja Demokratike e Kosovës u shpreh e shqetësuar për gjetjet e raportit të Reporterëve pa Kufij, por edhe të dy raporteve të publikuara së fundi nga Departamenti amerikan i Shtetit dhe organizata për të drejtat e njeriut, Freedom House, ku janë përmendur kufizimet ndaj lirisë së shprehjes dhe mediave.

“Lidhja Demokratike e Kosovës e sheh alarmuese këtë raport [të Reporterëve pa Kufij], i cili flet për ambientin tejet shqetësues të të bërit gazetari në Kosovë. Sepse, sot në këtë ditë botërore duhet të kujtojmë dhe vlerësojmë rëndësinë jetike të një shtypi të lirë dhe të pavarur, që është themeli i çdo demokracie të shëndetshme. Lidhja Demokratike e Kosovës vlerëson po ashtu se demokracia nuk mund të mbijetojë në heshtje. Për një shoqëri që dëshiron të avancojë, duhet një media e lirë që sfidon, pyet dhe kërkon llogari”, u tha në reagimin e LDK-së.
Ndërkaq, kreu i Aleancës për Ardhmërinë e Kosovës, Ramush Haradinaj, tha se mbrojtja e gazetarëve dhe mediave të lira është ndër “parimet e panegociueshme” dhe detyrë e institucioneve dhe shoqërisë.

“Shqetësues mbetet qasja e eksponentëve të pushtetit me sulmet e orkestruara që i bëjnë mediave dhe tendenca për kontroll ndaj tyre, duke shënuar regres alarmant sa i përket lirisë së medias, i vërtetuar edhe nga raportet e institucioneve kredibile ndërkombëtare”, tha Haradinaj përmes një postimi në Facebook.

Në raportin për të drejtat e njeriut të Departamentit amerikan të Shtetit, të publikuar muajin e kaluar, u citua Asociacioni i Gazetarëve të Kosovës që tha se “zyrtarë të Qeverisë, përfshirë kryeministrin dhe anëtarë të partisë në pushtet, janë angazhuar në fushata shpifëse për të minuar besimin e publikut në media”.

Po muajin e kaluar, Freedom House publikoi raportin për lirinë e medias, ku u listuan problemet me të cilat u përballën gazetarët më 2023. Aty u tha se pavarësisht se Kosova ka një peizazh të larmishëm mediatik, “në përgjithësi, liria e fjalës dhe shprehjes ka qenë disi e kufizuar”, teksa shumë media “hezitojnë të përfshihen në mbulim kritik për Qeverinë”./REL

Kosova

DRIDHET Serbia, dy ngjarjet që shkaktojnë tërmetin apokaliptik

Profesori dhe njohësi i çështjeve politike, Muhamet Kelmendi ka komentuar situatën që ka të bëjë me qeverinë e re të Serbisë dhe tha se me emrat e përzgjedhur, Serbia ka dalë lakuriq dhe ka treguar se nuk e do paqen në këtë pjesë të Evropës, madje sipas tij, po punon për bashkimin e tërë sllavëve në Ballkanin Perëndimor në një shtet serb.

Më tej, Kelmedi u shpreh se qëllimet e serbëve dolën sheshit edhe para zyrtarëve të BE-së, si Cameron i cili përmedi rrezikun për luftë, e po ashtu edhe Viola von Cramon e cila tha se BE-ja duhet të përzë Serbinë nga agjenda për intergrim.

“Krimineli i luftës Aleksandër Vuçiç i ka shpallur shumë shteteve të BE-së luftë politike” – deklaroi Kelmendi duke kujtuar se edhe vet Beogradi zyrtar e paralajmëroi se muaji maj do të jetë i veçantë, majde jetik për Serbinë.

Sipas profesorit, dy ngjarjet e mëdha që do të ndodhin gjatë këtij muaji, dhe që do ta trondisin Serbinë, janë pranimi i Kosovës në KiE dhe votimi në Asamblenë e Përgjithshme për gjenocidin serb në Srebrenicë.

Serbia shpalli botërisht luftën për armatim, si synim parësor të shtetit. Nga kryeministri i posaemëruar, Millosh Vucevic, u theksua se me armatim “sigurojmë shtetin serb”, por ai nuk përmendi nga kush kërcënohet?

“Serbia i ka forcuar bazat ushtarake serbe anës së kufirit me Kosovën. Po përgatiten edhe grupe të veçanta të armatosura për të vepruar. Priten aktivitete terroriste brenda në Kosovë si edhe në Malin e Zi e Bosnjë e Hercegovinë. As sllavët maqedon nuk kanë mbetur jashtë kësaj loje politiko-ushtarake serbe. Në “boten serbe” hyjnë Bosnja e Hercegovina, Kosova, Mali i Zi dhe Maqedonia e Veriut. Vend ka edhe për Shqipërinë” – përfundo analizën e tij Muhamet Kelmendi.

Kosova

Vuçiç rrënohet mendërish, komedia e pushtuesit të falimentuar

Avokati Spartak Ngjela thotë se ushtarët e ushtrisë të Shteteve të Bashkuara po këndojnë këto ditë në rrugët e Prishtinës këngën e tyre anglisht: Zoti e Bekoftë Kosovën, kurse presidenti serb Aleksandër Vuçiç, një ish ministër i drobitur i Sllobodan Millosheviçit, po u thotë serbëve në Beograd se “Do ta marrim Kosovën”.

“Po si serbët do ta marrin Kosovën, do të mundin Amerikën” – pyet avokati në një shkrim autorial, duke shtuar se e gjitha kjo është “Komedi e pushtuesit të falimentuar”.

“Shqipëria është në progres kombëtar të përditshëm. Se kjo kohë është koha e shqiptarisë; dhe është pikërisht ky fakt historik që e ka bërë Vuçiçin në Beograd të flasë përçart. Ai gënjen gjithë ditën, dhe flet me gjuhën e forcës. Por, duhet të kujtohemi se në historinë moderne, të gjithë pushtuesit barbarë, por të mundur, i turbullon mendërisht marrëzia e tyre me ngarkesa pushtuese, të cilën e kanë inerci të patologjisë së tyre. Se janë të sëmurë. Po Aleksandër Vuçiçit, nga po i vjen rrënimi mendor? Serbët kanë ardhur në Ballkan nga hiçi, dhe gjithë zhvillimin e tyre, deri para 34 vitesh, e kanë arritur me pushtime territoresh shqiptare, me shpërngulje të etnisë shqiptare drejt Turqisë, me vrasje, me dhunë, por përfundimisht u mundën. Kjo është historia e tyre në lidhje me Shqipërinë, por si të sëmurë që janë, nuk duan ta pranojnë. Kurse shqiptarëve aq iu bën, se tani janë në kohën e tyre” – ka shkruar avokat Ngjela, duke pyetur se “kë po gënjen Vuçiç, veten apo popullin serb me marrëzitë që flet”.

“Ai po gënjen më shumë, me fantazitë e diktatorit të mundur në luftë, që sheh natën ëndrrat e pushtimit të Kosovës; zgjohet në mëngjes i gëzuar; sheh realitetin e humbësit dhe del e flet botërisht si me makthin patologjik të njeriut shpesë-humbur që nuk do ta besojë të vërtetën. Po ku mund ta dijë Vuçiç që Kosova dhe Shqipëria janë sot dy shtetet shqiptare që përbëjnë risinë evropiane të Shekullit XXI?

Sepse nuk është e largët dita e bashkimit të të gjithë botës shqiptare në Gadishullin Ilirik: Shqipëri, Kosovë, Çamëri, Maqedonia e Veriut, Presheva, Bujanovci: gjithsej rreth 9 milionë shqiptarë. Se kjo nuk është më ëndrra e rilindasve tanë të mëdhenj, por është një realitet historiko-politik. Ja, kjo është bota shqiptare, në aleancë universale me Shtetet e Bashkuara të Amerikës. Ne shqiptarët sot duhet të jemi krenarë, se kjo aleancë është domosdoshmëri historike për të dy shtetet shqiptarë në Gadishullin tone” – ka potencuar Spartak Ngjela.

Kosova

HAPENI GOJEN, Kearns kërkon të publikohet hetimi për Banjskën

Shefja e Komitetit për Punë të Jashtme në Parlamentin e Britanisë së Madhe, Alicia Kearns, duke folur për sigurinë në Ballkanin Perëndimor, njoftoi se Shtetet e Bashkuara të Amerikës, e kanë përfunduar hetimin për sulmin terrorist në Banjskë të Zveçanit – komunë e banuar me shumicë serbe – në pjesën veriore të Kosovës, dhe kërkoi publikimin e rezultateve.

Duke qenë se në këtë fazë asnjë prej shteteve kryesore perëndimore nuk i ka bërë publike rezultatet e hetimeve, deputetja britanika kërkoi nga SHBA-ja të përgjigjen dhe t’i prezantojnë të gjeturat e hetimeve, posaçërisht për shkak se autoritetet serbe mohojnë përfshirjen në këtë sulm dhe rrezikut të përsëritjes së të njëjtës ngjarje.

“Aleatët duhet urgjentisht të publikojnë rezultatin e hetimeve, sepse e vërteta ka shumë rëndësi”, deklaroi Kearns.

Përsa i përket anëtarësimit të Kosovës në Këshillin e Evropës, posaçërisht mbi sugjerimet e diskutuara që themelimi i Asociacionit të Komunave me Shumicë Serbe të jetë kusht për Kosovën drejt avancimit në organizatë, ajo theksoi se nuk duhet të jetë parakusht Asociacioni i Komunave me Shumicë Serbe.

“Disa kanë thënë se Kosova duhet të pranohet në Këshillin e Evropës vetëm nëse krijon asociacionin. Britania e Madhe duhet ta kundërshtojë këtë. Unë nuk dua një tjetër Republikë Serbe në Ballkanin Perëndimor. Asociacioni sipas kushtetutës së Kosovës, duhet të themelohet si pjesë e dialogut Prishtinë-Beograd. Por nuk duhet të nxitohemi dhe nuk mund të bëjmë presion” – deklaroi Alicia Kearns.

Ndërkaq deputetët britanikë kanë miratuar unanimisht mocionin e propozuar nga Kearns, për sigurinë e Ballkanit Perëndimor pas një debati të mbajtur rreth kësaj teme.

Në mocion kërkohet që qeveria britanike të rrisë angazhimin e saj me partnerët rajonalë dhe aleatët ndërkombëtarë në përmirësimin e sigurisë në rajon. Ndërkaq, aty mbështetet integriteti territorial i Kosovës dhe Bosnjës, dënohet sulmi terrorist në Banjskë, si dhe bëhet me dije për ndërhyrjet ruse në Ballkan.

Gjatë debatit, deputetja britanike Kearns tha se duhet një aleancë e re e vendit të saj, SHBA-së dhe anëtarëve të tjerë të NATO-s bashkë me Kosovën që të ruhet paqja.

Kujtojmë se deputetja britanike është një ndër mbështetëset më të zëshme të Kosovës dhe që ka shfrytëzuar pozitën e saj të lartë për të mbrojtur pozicionin e vendit të vogël ballkanik në Parlamentin e Britanisë së Madhe, posaçërisht sa i përket procesit të dialogut.