Dilema e dialogut/ A është BE-ja ende e interesuar për vazhdimin?

Deputeti nga radhët e Partisë Demokratike të Kosovës , Enver Hoxhaj, nëpërmjet një postimi në platformën “X”, ka shprehur indinjatën rreth stanjacionit  të procesit të dialogut për normalizimin e marrëdhënive Kosovë-Serbi nën ndërmjetësimin e Bashkimit Evropian, duke parashtruar dilemën rreth rënies së interesimit të eurokratëve për këtë çështje.

Raundi i fundit i “negociatave të vështira” diplomatike nuk ka arritur t’i përmbushë pritshmëritë në aspektimin e krijimit të atmosferës së normalizimit të marrëdhënieve, pajtimit dhe zbatimit të shpejtë të angazhimeve që palët kanë marrë përsipër veçanërisht në fund të shkurtit në Bruksel dhe më pas në mes marsit në Ohër. Prandaj Hoxhaj ka shtruar një pyetje.

“Agresioni në shumë fronte i Serbisë kundër Kosovës, pas Marrëveshjeve të Brukselit/Ohrit, nuk po ndalet, duke shfrytëzuar aktet terroriste, duke lobuar në mënyrë aktive kundër shtetësisë së Kosovës. A është dikush ende i interesuar në BE- për dialog, nëse po, ndërmerrni veprime ose heshtja ua merr anën”, ka shkruar Hoxhaj

Eskalimi në shkallë të gjerë i situatës në veriun e trazuar të Kosovës ka ndikuar substancialisht në bllokimin e ecurisë së procesit të dialogut që po i mban të zënë diplomatët perëndimorë përgjatë kësaj kohe, megjithëse BE-ja pret nga palët që të rikthehen në tryezën e negociatave nën kujdesin e lehtësuesve evropianë në Bruksel.