Dita Ndërkombëtare e Personave të Zhdukur me Dhunë/ Osmani: Vuçiç me regjimin e tij po fle mbi varre masive

Presidentja e Kosovës, Vjosa Osmani, në Ditën Ndërkombëtare të Personave të Zhdukur me Dhunë, i ka kujtuar edhe njëherë Serbisë se, edhe pas dy dekadash nga përfundimi i luftës, 1584 të zhdukur ende i mungojnë vendit të tyre.

Ajo thotë se varret e hapura janë dëshmi e gjallë e krimeve të luftës dhe e krimit të përsëritur nga regjimi gjenocidal serb, si dhe kujtesë e përditshme se drejtësia nuk është vënë ende në vend.

“Për sa kohë që mijëra qytetarë tanë mbesin të zhdukur, paqja mbetet e paplotë”, thekson Presidentja.

Osmani i kujton Presidentit serb se me regjimin e tij ai vazhdon të flejë mbi varrezat masive, duke mbajtur peng zbardhjen e fatit të të zhdukurve.

Ndërkohë, ajo u bën thirrje ndërkombëtarëve se ka ardhur koha që të rrisin presionin mbi Serbinë lidhur me këtë çështje.

Postimi i Presidentes së Kosovës, Vjosa Osmani:

Në Ditën Ndërkombëtare të Personave të Zhdukur me Dhunë, kujtojmë plagën e hapur të Kosovës. 1584 qytetarë tanë ende mungojnë. Pas çdo numri është një jetë e ndërprerë, një familje e cila prej më shumë se dy dekadash pret drejtësinë për më të dashurit.

Varret e hapura janë dëshmi e gjallë e krimeve të luftës dhe e krimit të përsëritur nga regjimi gjenocidal serb, si dhe kujtesë e përditshme se drejtësia nuk është vënë ende në vend. Për sa kohë që mijëra qytetarë tanë mbesin të zhdukur, paqja mbetet e paplotë.

Regjimi i Vuçiqit vazhdon të flejë mbi varreza masive, duke mbajtur peng zbardhjen e fatit të të zhdukurve. Është koha që partnerët ndërkombëtarë ta rrisin presionin mbi Serbinë, sepse vetëm zbardhja e fatit të të zhdukurve, si dhe drejtësia, mund t’u japin familjeve qetësinë që meritojnë.