Do marrim në dorë fatin e Europës/ Kancelari gjerman: Nuk kemi nevojë për shpëtimin e Amerikës së Trump

Kancelari gjerman Friedrich Merz i është përgjigjur strategjisë së re të sigurisë kombëtare të administratës Trump, duke deklaruar se Evropa nuk ka nevojë për “shpëtim” nga Shtetet e Bashkuara, por për një pavarësi më të madhe në politikat e mbrojtjes. Në një deklaratë të dhënë të martën, kreu i ekonomisë më të madhe të Evropës theksoi se dokumenti i ri i Uashingtonit, i cili i portretizon aleatët evropianë si të dobët, vetëm sa konfirmon nevojën urgjente që BE-ja të marrë fatet e sigurisë në duart e veta.Duke iu referuar toneve kritike të strategjisë amerikane ndaj politikave evropiane, Merz hodhi poshtë me forcë idenë se demokracia e kontinentit të vjetër është në rrezik dhe kërkon ndërhyrje nga jashtë.

“Që amerikanët duan të shpëtojnë demokracinë në Evropë tani, nuk shoh ndonjë nevojë për këtë,” u tha Merz gazetarëve në Mainz. “Nëse do të duhej të shpëtohej, ne do ta menaxhonim vetë.”

Ai shtoi se, ndërsa disa pjesë të dokumentit amerikan janë të kuptueshme, të tjera janë “të papranueshme për ne nga pikëpamja evropiane”.

Strategjia e publikuar të premten nga administrata Trump ofron mbështetje të heshtur për partitë e ekstremit të djathtë në Evropë dhe kritikon qasjen e BE-së ndaj fjalës së lirë dhe migracionit. Kjo ka ngjallur reagime edhe nga Presidenti i Këshillit Evropian, António Costa, i cili paralajmëroi SHBA-në kundër ndërhyrjes në punët e brendshme të Unionit.

Për Kancelarin Merz, përmbajtja e strategjisë nuk ishte befasi. Ai e lidhi atë me një fjalim të Zëvendëspresidentit amerikan JD Vance në Mynih shkurtin e kaluar.

“Kjo nuk është një surprizë, por tani është konfirmuar përsëri. Është dokumentuar,” tha Merz, duke shtuar se fjalimi i Vance kishte shërbyer si një kambanë alarmi që çoi në rritjen e shpenzimeve të mbrojtjes nga ana e Gjermanisë.

Qeveria e Merz, e cila mori detyrën në maj, ka ndërmarrë hapa konkretë për të rritur buxhetin ushtarak, duke lehtësuar rregullat strikte të borxhit. Kjo lëvizje vjen si përgjigje ndaj situatës gjeopolitike pas pushtimit rus të Ukrainës, por edhe si reflektim i presionit të vazhdueshëm nga SHBA-ja për rritjen e kontributit në NATO.

Në mbyllje, Merz ofroi një qasje pragmatiste për marrëdhëniet transatlantike:

“Në bisedimet e mia me amerikanët, them: ‘America First’ (Amerika e para) është në rregull, por ‘America Alone’ (Amerika e vetme) nuk mund të jetë në interesin tuaj. Ju keni nevojë për partnerë… Dhe nëse nuk mund të bëni asgjë me Evropën, atëherë të paktën bëjeni Gjermaninë partneren tuaj.”