Dodik ia hedh paq…dorëzohet, paguan gjobën dhe shmang dënimin me burg

Presidenti i Republikës Srpska, Milorad Dodik, ka rënë dakord të paguajë shumën e caktuar nga gjykata për të shmangur një dënim me një vit burg, të cilin e mori pas një vendimi të formës së prerë për shpërfillje të urdhrave të Përfaqësuesit të Lartë në Bosnje dhe Hercegovinë .
“Me kërkesën e mbrojtjes së të dënuarit Milorad Dodik për të zëvendësuar dënimin me burg me gjobë, gjykata nxori një vendim në përputhje me dispozitat e ligjit, duke miratuar kërkesën e lartpërmendur të mbrojtjes pasi dëgjoi mendimin e Prokurorisë së Bosnjës dhe Hercegovinës dhe duke e dënuar të dënuarin Milorad Dodik me gjobë në vend të dënimit me burg”, sipas deklaratës zyrtare nga Gjykata e Bosnjës dhe Hercegovinës.
Dodik pagoi shumën prej 18,000 eurosh dhe kështu shmangu një dënim me burg prej 365 ditësh. Ligji i Bosnjë-Hercegovinës përcakton që një dënim me burg deri në një vit mund të zëvendësohet me gjobë nëse përmbushen kërkesat ligjore dhe gjykata e miraton një kërkesë të tillë.
Përveç dënimit, Dodikut iu dha një ndalim tjetër: një ndalim gjashtëvjeçar për të mbajtur poste politike. Si rezultat i këtij vendimi, Komisioni Qendror Zgjedhor i Bosnjës dhe Hercegovinës (KQZ) ia revokoi mandatin si president i entitetit Republika Srpska.