E BUJSHME/ Kazakët trokasin në dyert e Kukësit, por duhet zgjidhur nyja…”Gjici”

Klubi i Kukësit mund të ndryshojë pronar në të ardhmen, ose mund t’i shtohen disa të tjerë përveç familjes Gjici. Megjithatë, kjo do të varet nga negociatat, por prej kohësh përflitet se këta të fundit mund ta shesin klubin pas skandalit që la në burg ish kryetarin e Bashkisë dhe njëkohësh ish presidentin e nderit të skuadrës kuksiane, Safet Gjicin. Skenari i dytë është përgënjeshtruar pothuajse sistematikisht nga familjarët e tij dhe zyrtarët e klubit, të cilët vazhdojnë të këmbëngulin për aksionet.

Një konsorcium me seli në Kazakistan, që mësohet se kanë lidhje me klubin e Astanës, por deri pak kohë më parë kishin aksione edhe te klubi bjellorus, Shakhter Soligorsk, është emri që qarkullon për të ardhmen e presidencës. Duhet saktësuar se klubi i Astanës në Kazakistan ka si pronar zyrtar kompaninë shtetërore Samruk Kazyna.

Vetë familja Gjici ka mohuar zyrtarisht të ketë pasur bisedime konkrete, por gazeta Panorama Sport ka mësuar se disa përfaqësues të një kompanie kazake kanë qenë në Tiranë në datat 24-25 tetor. Burime nga klubi bëjnë me dije se ata kanë vizituar ambientet e klubit, kanë parë stadiumin dhe kanë mbetur të kënaqur relativisht nga infrastruktura. Pas qëndrimit në Shqipëri, ata kanë shkuar për të parë nga afër ndeshjen mes Astanës dhe Ballkanit, e vlefshme për fazën e grupeve të Ligës së Konferencësqë u luajt më 26 tetor në Prishtinë dhe përfundoi me fitoren emiqve 1-2.

Pas publikimit të lajmit, dje në portale nisi të flitej për shifrën e 2.5 milionë eurove, por kjo nuk është e konfirmuar. Kur flitet për klubin e Kukësit duhet të jetë e qartë se bëhet fjalë vetëm për logon dhe “brand”-in, por jo për stadiumin dhe terrenet sportive. Kompania kazake, emri i së cilës mbahet sekret nga drejtuesit e Kukësit, mësohet se ka mbetur e kënaqur, mbi të gjitha, për dy motive: së pari Kukësi nuk ka borxhe dhe nuk figuron një klub me probleme financiare të mbartura.

Së dyti, sepse ka një infrastrukturë goxha të mirë, por është edhe si një urë lidhëse edhe në aspektin sportiv mes Shqipërisë dhe Kosovës. Mësohet se oferta e tyre verbale ka qenë që të blejnë të gjitha aksionet e Kukësit, ose t’i lënë familjes Gjici rreth 30 për qind të aksioneve për 3 vitet e ardhshme dhe më pas të negociojnë sërish. Palët janë ende duke reflektuar dhe nuk ka një vendim.