Egjipti me plan për rindërtimin e Gazës, kundërvënie ndaj propozimit të Trumpit

Egjipti është duke zhvilluar një plan për ta rindërtuar Gazën pa i detyruar palestinezët që të largohen nga enklava, si kundërpërgjigje ndaj propozimit të presidentit amerikan, Donald Trump, për ta shpopulluar atë territor në mënyrë që kontrolli të merret nga amerikanët.

Gazeta shtetërore egjiptiane, “Al-Ahram”, raporton se në propozimin e Egjiptit bëhet thirrje për themelimin e “zonave të sigurta” brenda Gazës, ku palestinezët mund të banojnë fillimisht, përderisa kompanitë ndërtimore egjiptiane dhe ndërkombëtare ta rehabilitojnë infrastrukturën e Gazës, shkruan gazeta “The Times of Israel”.

Zyrtarët egjiptianë kanë qenë duke e diskutuar planin me diplomatë evropianë si dhe me Arabinë Saudite, Katarin dhe Emiratet e Bashkuara Arabe, sipas dy zyrtarëve egjiptianë e diplomatëve arabë e perëndimorë. Ata gjithashtu po diskutojnë për mënyra se si të financohet rindërtimi, përfshirë një konferencë ndërkombëtare për rindërtimin e Gazës, thanë njëri nga zyrtarët egjiptianë dhe një diplomat arab.

Zyrtarët dhe diplomatët folën në kushte anonimiteti, sepse rreth këtij propozimi ende janë duke u zhvilluar negociata.

Plani i Egjiptit vjen pas reagimeve e kundërshtimeve ndërkombëtare ndaj thirrjes së Trumpit për largimin e popullsisë së Gazës prej rreth dy milionë palestinezësh. Trumpi ka sugjeruar që kontrollin e enklavës ta marrë ShBA-ja dhe ta rindërtojë atë, duke e shndërruar në “rivierë të Lindjes së Mesme”, edhe pse palestinezëve nuk do t’u lejohej kthimi në tokat e tyre.

Palestinezët kanë thënë gjerësisht se nuk do të largohen nga atdheu i tyre, ndërsa Egjipti dhe Jordania, të mbështetura nga Arabia Saudite, i kanë refuzuar thirrjet e Trumpit që ta pranojnë popullsinë e Gazës. Grupet për të drejtat e njeriut kanë thënë gjerësisht se plani i presidentit amerikan përbën dëbim me forcë, krim lufte i mundshëm.

Edhe shtetet evropiane kanë dalë kundër planit të Trumpit. Sidoqoftë, kryeministri izraelit, Benjamin Netanyahu, e ka çmuar idenë e presidentit amerikan dhe ka thënë se Izraeli është duke u përgatitur për ta zbatuar atë./Nacionale