Ekitike në “garë me kohën”, talenti francez pranë kalimit te “Shqiponjat” gjermane

Nën drejtmin e teknikut, Christophe Galtier luajti goxha minuta në fushën e blertë, madje u konsiderua edhe një ndër talentet më të mëdha të futbollit francez, mirëpo me ardhjen e spanjollit, Luis Enrique, në stolin e “gjigantëve”, të Paris Saint-Germain, 21-vjeçari, Hugo Ekitike ka dalë jashtë çdo plani, teksa ka arritur të zbresë në fushë vetëm 1 herë gjatë këtij sezoni.

Sipas raportimeve më të fundit të mediave franceze, talenti i repartit ofensiv është shumë pranë transferimit te “Shqiponjat” gjermane, të Eintracht Frankfurt, teksa mësohet se është nisur drejt Gjermanisë për të kryer me shpejtësi testet mjekësore e më pas të nënshkruajë kontratën përfundimtare, me të gjitha këto veprime që duhen kryer në kohë rekord, pasi merkatoja në Gjermani mbyllet në orën 18:00, të kësaj të enjteje.

Përsa i përket detajeve të kontratës, Ekitike do të kalojë te skuadra e Eintracht, në formën e huazimit me të detyrim blerje, për shifrën e 30 milionë eurove, si dhe do të ketë një klauzolë të veçantë që i lejon “parisienët” të përfitojnë nga shitja në të ardhmen, ndërsa për kontratën personale të lojtarit ende nuk është mësuar ndonjë detaj.