Connect with us

Aktualitet

Është Vjena qendër e xhihadistëve të Ballkanit?

Gjatë sulmit në lagjen e vjetër të Vjenës, atentatori kishte vënë në mes rrip të mbushur me lëndë shpërthyese dhe ishte armatosur deri në dhëmbë me pushkë, pistoletë dhe thikë. Dhe me sa duket ishte shumë i vendosur të vriste njerëz. 20 vjeçari Kujtim F. njihej mirë nga autoritetet austriake të sigurisë. Një vit më parë austriaku me origjinë shqiptaro-maqedonase kishte dashur t’i bashkohej Shtetit Islamik, IS. Për këtë arsye ishte dënuar me 22 muaj burgim. Më 5 dhjetor 2019, ai ishte liruar me kusht. Sepse duke qenë i ri pa e mbushur moshën madhore, ai gëzonte privilegjet që jep në Austri ligji për të miturit, (JGG).

Kujtim F. ndodhej nën kujdesin e Shoqatës DERAD, që është e specializuar për çradikalizimin e të rinjve myslimanë dhe punon së bashku me ministrinë e Brendshme në Vjenë. “Unë nuk do kisha menduar kurrë se ai mund të kthehej në atentator,” thotë ish-avokati mbrojtës, Nikolaus Rast. Ai vinte nga “një familje normale” dhe kishte rënë në shoqëri të keqe, shton ai. “Sikur të mos kishte shkuar në xhami, por të kishte shkuar në boks, atëherë ai do ishte bërë boksier,” beson Rast. E ëma e atentatorit pati shkuar dy vjet më parë në zyrën e tij, sepse i biri ishte zhdukur. Ai ishte radikalizuar në internet. Plumbat e policisë i dhanë fund jetës së të riut, të hënën (2.11) në mbrëmje në afërsi të kishës, Rupertskirche, në qendër të Vjenës.

Ka pasur shenja që tregonin se ai ishte duke përgatitur një sulm, pranon ministri austriak i Brendshëm, Karl Nehammer (ÖVP) një ditë pas atentatit. 20 vjeçari ka nisur një fotografi në llogarinë e tij në Instagram, ku ka dalë me dy armë në dorë, armë që i ka përdorur më pas gjatë sulmit. Nehammer ia ka hedhur kështu fajin partneres së koalicionit nga partia e Gjelbër, ministres së Drejtësisë, Alma Zadic. Atentatori 20 vjeçar ka arritur të mashtrojë “programin e çradikalizimit të drejtësisë”. Kështu gjatë një takimi me DERAD në muajin tetor ai ka dënuar sulmet terroriste të Francës, megjithatë ekzistojnë “shumë të dhëna për radikalizimin e tij,” tha në konferencë shtypi të martën (3.11) drejtori i përgjithshëm i sigurisë publike, Franz Ruf. “I domosdoshëm është evaluimi i sistemit dhe përmirësimi i sistemit të drejtësisë,” thotë ministri i Brendshëm, Nehammer.

Ai nuk thotë pse shërbimet e ministrisë së tij, nuk e kishin më mirë nën kontroll 20 vjeçarin, megjithëse ai kishte të kaluar radikale. Në të ardhmen duhet marrë edhe këshilla e autoriteteve të sigurisë, kur ndodhin lirime nga burgu.

Organizatat myslimane dënojnë sulmin

Komuniteti fetar mysliman në Austri (IGGÖ) u indinjua nga sulmi, të cilin kryetari Ümit Vural e quajti “sulm mbi Vjenën tonë”. IGGÖ i ofroi bashkëpunim pa kufizim autoriteteve të sigurisë. Ata ndodhen po ashtu në bashkëpunim me komunitetet e tjera fetare. Vural theksoi se “rendi liberal” është më i fortë se “dhuna dhe terrori”. Shoqata e xhamive turke, ATIB dënoi sulmin. “Terrorizmi nuk ka fe dhe atdhe”, tha kryetari i saj, Fatih Yilmaz. Përgjigja e vetme është “bashkëpunimi dhe solidariteti”. Kryetari i ATIB vlerësoi lart “fjalimin e diferencuar dhe të menduar të kancelarit Kurz, për të mos i vënë të gjithë myslimanët nën një emërues të përbashkët”. Kryeministri austriak pati theksuar se armiku nuk janë anëtarët e një feje, por janë ekstremistët islamikë. Islamistët duan të përçajnë shoqërinë, por “kësaj urrejtje nuk do t’i lihet aspak hapësirë”, tha kancelari një ditë pas sulmit në Vjenë.
Edhe alevitët dhe rinia myslimane e dënuan sulmin. Kemi të bëjmë me një sulm frikacakësh ndaj njerëzve të pafajshëm, sulm ndaj mënyrës vjeneze të jetesës, sulm kundër Austrisë, kundër shoqërisë”, thanë përfaqësuesit e rinisë myslimane. Ditën e premte (xhuma), të rinjtë myslimanë do të përkujtojnë viktimat e sulmit.

Burgjet “djepe të radikalizimit”

Hoxha Ramazan Demir, që ka qenë më parë hoxhë në burg, e vë gishtin mbi plagë. “Burgjet janë djepe radikalizimi”, thekson ai. Edhe revista “Profil” flet në numrin e fundit për mungesa në sistemin e sigurisë në burgjet austriake. Kështu sipas Ministrisë vjeneze të Drejtësisë, është rritur numri i celularëve të futur kontrabandë në burg. Vitin e kaluar janë konfiskuar 1000 celularë të futur ilegalisht në burgje, 720 më shumë se një vit më parë. Në qelinë e një ish-idhtari të Hamasit, në burgun e Gracit u gjet një celular pranë katër kutive fishekësh. Ai mendohet të ketë organizuar nga qelia e tij një atentat, gjë që avokati i tij nuk e pranon. Revista flet edhe për Lorenz K, një të burgosur idhtar të IS, i cili ka zhvilluar nga burgu në Stein, një chat me një idhtare të IS në Siri. Ai i ka dërguar një fotografi gruas, në të cilën ka dalë para një flamuri të zi të IS, fotografi e bërë në qeli. “Ky flamur ka qenë gjithnjë në qeli,” ka thënë ai kur është marrë në pyetje nga punonjësit e Zyrës federale për mbrojtjen e kushtetutës dhe luftimin e terrorizmit, (BVT), “të gjithë e kanë ditur dhe askush nuk ka ndërmarrë gjë kundër”. Ai po ashtu ka shpërndarë përmbajtje për IS nga profili i tij në instagram, mes të cilave besnikëri për vdekje ndaj udhëheqësit të ri të milicëve terroristë. Avokati mbrojtës i tij, e quan klientin e tij “naiv notorik”, i burgosuri vetë i hedh poshtë të gjitha akuzat që i bëhen.

“Që aty ka lëvizje”, është parë qartë ditët e fundit në forumet përkatëse, thotë drejtori i Qendrës së kontaktit për parandalimin e ekstremizmit në komunitetin fetar islamik, Nadim Mazarweh. Njeriu duhet të mësojë që të interpretojë si duhet retorikën që përdorin këta njerëz, thotë ai, në mënyrë që të pengohen sulme të tilla terroriste në të ardhmen.

Austria, qendër e xhihadistëve nga Ballkani

Austria ka kohë që është kthyer në qendër të xhihadistëve të Ballkanit, por edhe atyre nga Kaukazi. “Pjesa më e madhe e xhihadistëve që janë nisur nga Austria për të luftuar për organizatat terroriste jashtë vendit, janë çeçenë,” shpjegonte ministri i Brendshëm austriak, Karl Nehammer (ÖPV) pas sulmeve të fundit terroriste në Paris. Qeveria e Vjenës bëri të ditur pas sulmeve të Parisit, se do të krijojë një “Taskforce”, e cila duhet të merret me rreziqet që ekzistojnë nga shoqëritë paralele”. Shoqata vjeneze, DERAD, duhet të largojë nga xhihadizmi myslimanët e radikalizuar në burgje dhe të pengojë që të rinjtë myslimanë të përfundojnë në skenën politike islame. Ky sistem është ende duke u provuar, në të ardhmen duhet marrë edhe mendimi i specialistëve të çështjeve të sigurisë kur ka lirime të parakohshme nga burgjet, thotë ministri i Brendshëm. Në pranverë në Grac u dënuan me burgim xhihadistë udhëheqës. Nëpërmjet një shoqate besimtarësh në Grac, ata kishin çuar kontrabandë në Lindjen e Mesme njerëz për të luftuar. Shteti Islamik ka vite që rekruton luftëtarë të Zotit edhe nga Ballkani. Qendrat më të nxehta atje janë Sanxhaku në trekëndëshin Bosnjë, Serbi, Kosovë si dhe vendet që ndodhen përreth. Video me propagandë të IS i drejtohen të rinjve nga shtetet e Ballkanit. Emrat që ata përdorin në luftë flasin për prejardhjen. Ata quhen Al-Bosni, Al-Kosovi, Al-Albani. Vizioni që kanë radikalët është ta kthejnë Ballkanin në kalifat. Gjurmët e tyre të çojnë gjithnjë e më shumë në Vjenë.

Heronj të mediave sociale

Ndërkohë heronj të mediave sociale janë bërë pas sulmit të Vjenës dy sportistë të sporteve marciale me prejardhje turke. Të hënën në mbrëmje ata arritën të nxirrnin nga rreziku dy persona, një prej të cilëve një polic i plagosur. “Ne myslimanët me prejardhje turke dënojmë çdo lloj terrorizmi,” thotë njëri prej tyre në një video të postuar në Instagram. Ata kishin dalë të pinin një kafe, para fillimit të ndalim qarkullimit,” tregon njëri prej tyre.

Hit në mediat sociale u kthye edhe video e një burri, që e shante atentatorin nga dritarja e një ndërtese në qendër të Vjenës, duke folur dialektin vjenez: ” Schleich di, du Oaschloch”, “qërrohu, plehrë”.

dw

 

Advertisement
Click to comment

Leave a Reply

Your email address will not be published. Required fields are marked *

Aktualitet

Policia e Veliajt arreston 2 protestues, hodhën molotov para Bashkisë së Tiranës

Policia ka ndaluar dy persona të cilët morën pjesë në protestën para Bashkisë Tiranë, në datat 11 dhe 19 prill, ku kërkonin dorëheqjen dhe marrjen si të pandehur nga SPAK të kryebashkiakut Erion Veliaj, pas aferës korruptive “5D’.

Sipas njoftimit, Lulzim Nela dhe Ahmet Maja kanë ushtruar akte të dhunshme, kanë kundërshtuar me forcë punonjësit e policisë, kanë hedhur lëndë piroteknike e molotov në drejtim të punonjësve të policisë dhe të Bashkisë së Tiranës.

Ata akuzohen për veprat penale “Goditjet për shkak të detyrës”, “Prishja e qetësisë publike”, “Shkelja e rregullave mbi lëndët plasëse dhe djegëse”, dhe “Shkatërrimi i pronës me zjarr”, kryer në bashkëpunim.

Continue Reading

Aktualitet

Fermeri me kastravec në dorë thirrje Ramës: Ja ku e ke…

Fermeri Ilir Malka nga fshati Suk i Roskovecit ka deklaruarse ishte sot brenda në mbledhjen e Këshillit Bashkiak gjatë miratimit të ndërtimit të termocentralit. Malka tha se me kënaqësinë më të madhe të gjithë anëtarët e majtë të Këshillit, ngritën dorën të urdhëruar nga kryetarja e Bashkisë, për miratimin e ndërtimit të termocentaralit në fshatin e tij.

Fermeri iu drejtua dhe kryeministrit Rama kur thoshte: “Kjo është Toscana e tij, ja këtu e ka Toscana-n”.

Bashkia Roskovec ka vendosur për të miratojë ndërtimin e Termocentralit në zonën bujqësore, të Suk 1. Edhe pse u kundërshtua nga banorë të zonës dhe këshilltarë të majtë mbledhjen e sotme të këshillit bashkiak është miratuar mes debatesh të ashpra ky investim i ri.

Ditën e diel banorët dolën në protestë duke e kundërshtuar ndërtimin e termocentrali duke e cilësuar njëzëri vdekjeprurës ndërtimin e këtij termocentrali në zonën e tyre duke theksuar se prania e tij do të shkatërrojë një sipërfaqe bujqësore prej 700 ha me sera.

Në mbledhjen e mëparshme të këshillit bashkiak ky projekt ka ngjallur debate të shumta dhe është rrëzuar me shumicë kartonash nga këshilltarë të majtë e të djathtë. Në mbështetje të banorëve, ditën e sotme protestës i janë bashkuar edhe përfaqësuesit e shoqatave ambientaliste të cilët e kanë cilësuar këtë investim një bombë ekologjike.

Continue Reading

Aktualitet

Ambasadori i Rusisë në Tiranë largohet nga Shqipëria, ja kush e zëvendëson

Ambasadori i Rusisë në Shqipëri, Mikhail Afanasiev ka përfunduar sot misionin e tij diplomatik dhe është larguar drejt Moskës.

Lajmin e bën me dije Ambasada e Federatës Ruse në Shqipëri. Tashmë postin e të ngarkuarit me Punë i Rusisë në vendin tonë do ta mbajë Sergey Lysikov.

“Sot, më 26 prill, Shkëlqesia e Tij Ambasadori i Jashtëzakonshëm dhe Fuqiplotë i Federatës Ruse në Republikën e Shqipërisë, Mikhail Afanasiev përfundoi misionin e tij diplomatik dhe u nis për në Moskë. Ministri Këshilltar i Ambasadës, Sergey Lysikov është emëruar I Ngarkuari me Punë i Rusisë në Shqipëri”, lajmëron Ambasada ruse në Tiranë.

Continue Reading

Aktualitet

I hoqën nga duart dy herë tenderat dhe ia dhuruan ‘4 A-M’, SPAK merr të pandehur zyrtarë në bashkinë Tropojë

Tre zyrtarë të bashkisë Tropojë, të cilët kanë marë pjesë në dy procedura tenderuese të shpallur nga ky institucion, janë marë të pandehur nga prokuroria e Posaçme SPAK, për akuzën e “Shkeljes së barazisë në tendera apo ankandeve publike”.

Zenel Çela, specialist i lartë, Ramiz Bardhi me detyrë specialist i Lartë dhe Rexhep Ismajlisufaj me detyrë ekonomisht, gjatë fazës së hetimeve kanë pranuar fajësinë dhe nisur nga kjo situatë SPAK i ka marë të pandehur duke i dërguar në gjykatë.

Tre të pandehurit, ish-zyrtarë të bashkisë Tropojë kanë pranuar autorësinë e krimit duke lidhur marëveshje fajësie me SPAK, ku Zenel Çela, pranon të dënohet me 1 vit burgim por ky dënim me burg të konvertohet me dy vjet shërbim prove, ku gjatë kësaj kohe i dënuari të mos kryejë asnjë vepër penale.

Më të njëjtën masë dënimi kanë dakordësuar për tu dënuar dhe dy të pandehurit e tjerë, Ramiz Bardhi dhe Rexhep Ismajlisufaj.

Sipas dosjes hetimore tre zyrtarët kanë abuzuar gjatë fazës së drejtimit të komisionit të vlerësimit të ofertave në dy procedura tenderuese të shpallura nga bashkia Tropojë.

E para lidhet rikonstruksionin e gjimnazit “Asim Vokshi” dhe palestër, plus terrene sportive dhe sistemime të jashtme me fond limit mbi 53 milionë lekë.

Ndërsa tek e dyta bëhet fjalë për rikonstruksionin e shkollës “Tinka Kurti” në fshatin Lekbibaj.

Në të dyja këto procedura tre anëtarët e komisionit të vlerësimit të ofertave në kushte të paqarta dhe pamotivuara, kanë përjashtur në mënyrë të qëllimshme Bashkimin e Operatorëve “Halili 1” dhe “Shëndëlli”, kompani këto që administrohen nga Kujtim Byberi dhe Yzedin Bozhaj.

Sipas SPAK, funksionarët e bashkisë Tropojë me vendimarjen e tyre kanë favorizuar në procedurën e rikonstruksionit të gjimnazit “Asim Vokshi”, subjektin  “4 A-M” që zotërohet nga Ardit Metaliaj.

Në dosje e prokurorisë thuhet se:

“…komisioni i vlersimit të ofertës i përbërë nga Ramiz Bardhi , kryetar  Specilist i Lartë, Zenel Çela, anëtarë Specialist i Lartë dhe Rexhep Isajlisufaj, anëtar  Ekonomist më 18 qershor 2019 kanë skualifikuar Bashkimin e Operatorëve “Halili 1” & “Shëndelli”,  i cili ka marrë pjesë në procedurën e prokurimit me objekt “Shkolla Asim Vokshi-Palestër dhe terrene sportive dhe sistemime të jashtme në gjimnazin Asim Vokshi” me fond limit 50,319,591 lekë, duke paraqitur ofertën në vlerën vlerë 42.072.833 lek pa tvsh dhe kanë kualifikuar si fitues operatorin ekonomik 4 A-M me ofertën 50.269.533 lek pa tvsh…”.

Por shkeljet e tre zyrtarëve të bashkisë Tropojë, janë rënduar akoma dhe më tepër në procedurën e dytë, atë të rikonstruksionit të shkollës “Tinka Kurti” në Lekbibaj me vlerë financiare prej 186 milion lekë të vjetra.

Sipas dosjes së SPAK, tre të pandehur fillimisht kanë shpallur fitues Bashkimin e Operatorëve “Halili 1” & “Shendelli”. Madje përfaqësuesit ligjorë të dy kompanive kanë lidhur dhe kontratën me bashkinë Tropojë. Por në rrethana të habitshme dhe shkaqe të pajustifikuara me ligj, është bërë skualifikimi.

Në dosje nënvizohet si më poshtë vijon:

“…me vendimin Nr.13 të 18 qershorit 2019 B.O “Halili 1” & “Shendelli” është shpallur fitues në këtë procedurë prokurimi dhe ka lidhur kontratën në 27 qershor 2019. Por më vonë këto dy kompani janë skualifikuar me argumentin se “makineritë dhe drejtuesi teknik, punonjësit, manovratorët të deklaruar në këtë procedurë prokurimi, do të jenë të angazhuara në këtë kontratë…”.

Pas përjashtimit të dy subjekteve në këtë tender, anëtarët e komisionit të Vlerësimit të Ofertave, kanë shpallur fitues sërisht kompaninë e Ardit Metaliaj, të subjektit “4 A-M”.

E njëjta kompani që fitoi rikonstruksionin e shkollës “Asim Vokshi”, fitoi me të njëjtën skemë dhe rikonstruksionin e shkollës “Tinka Kurti” në Lekbibaj të Tropojës, duke pëjashuar dy subjektet e tjera, “Halili 1” & “Shendelli”.

Tre të pandehurit, ish-zyrtarë të bashkisë Tropojë kanë pranuar autorësinë e krimit duke lidhur marrëveshje fajësie me SPAK, ku Zenel Çela, pranon të dënohet me 1 vit burgim por ky dënim me burg të konvertohet me dy vjet shërbim prove, ku gjatë kësaj kohe i dënuari të mos kryejë asnjë vepër penale.

Më të njëjtën masë dënimi kanë dakordësuar për tu dënuar dhe dy të pandehurit e tjerë, Ramiz Bardhi dhe Rexhep Ismajlisufaj.

Continue Reading

Aktualitet

Burri i Ibrahimajt goditi me thikë drejtorin/ Reagon Policia: I morëm dëshminë dhe ia kaluam Prokurorisë

Policia e Shtetit ka reaguar pas publikimit në media të lajmit se burri i ministres Delina Ibrahimaj është arratisur jashtë shtetit, pasi kishte goditur me thikë një zyrtar të lartë, duke i kërkuar që të jepte dorëheqjen.

Edhe pse ngjarja ka ndodhur në nëntor të vitit të kaluar, ajo u raportua vetëm sot nga mediat. Ndërsa edhe pse kanë kaluar mbi pesë muaj nga hetimet, duket se ende nuk ka asnjë urdhër ndalimi të lëshuar ndaj autorit të dyshuar.

Burri i ministres Delina Ibrahimaj, Andri Ibrahimaj, thuhet se qëlloi me thikë për shkak të detyrës drejtorin e përgjithshëm të Agjencisë së Trajtimit të Kredive (ATK), Ari Koshaj. Kjo është e vërtetuar edhe me aktin e ekspertizës mjeko-ligjore që thotë se Koshaj ka dy prerje me thikë.

Megjithatë, policia thotë se ka vepruar në përputhje me ligjin, duke njoftuar se e ka referuar ngjarjen për veprën penale “goditje për shkak të detyrës”, ndaj Andri Ibrahimatj.

Njëkohësisht, policia konfirmon se Andri Ibrahimajt i është marrë dëshmia pas ngjarjes dhe është lënë i lirë. Raportohet se Andri Ibrahimaj ndodhet jashtë shtetit prej disa muajsht tashmë.

Njoftimi i Policisë së Shtetit:

Në lidhje me një lajm të publikuar në disa media për veprimet e Policisë së Shtetit, pas marrjes së një kallëzimi, sqarojmë se:

Më datë 21.11.2023 i është marrë kallëzimi shtetasit E.K. se, në rrugën “Tefta Tashko Koço” është kanosur dhe goditur për shkak të detyrës nga shtetasi A.I. Shtetasit E.K. i është dhënë vendim mjeko-ligjor.

Në vijim të veprimeve dhe në zbatim të detyrave të lëna nga prokurori i procedimit penal u është marrë deklarim shtetasve A.I., E.M. e O.M. dhe materialet janë referuar në prokurori më datë 04.12.2023 për veprën penale “Goditje për shkak të detyrës”, në ngarkim të shtetasit A.I.

Policia e Shtetit mbetet maksimalisht e angazhuar në përmbushjen e misionit të saj për ruajtjen e rendit e të sigurisë publike, garantimin e zbatimit të ligjit, në përputhje me Kushtetutën dhe aktet ndërkombëtare, duke respektuar të drejtat dhe liritë e njeriut”, njofton policia.

 

Ish drejtori i Përgjithshëm i Agjencisë së Trajtimit të Kredive, Eri Koshaj ka kallëzuar në polici në 20 nëntor 2023, bashkëshortin e ministres Delina Ibrahimaj, se e ka qëlluar me thikë për shkak të detyrës.

Në kallëzim, Koshaj deklaron se ka qenë mëngjes kur ai po ecte në rrugën “Tefta Tashko Koço” dhe prej një lokali ka dalë bashkëshorti i ministres Andi Ibrahimi, i cili i ka kërkuar të sqaroheshin në një ambient aty pranë.

Continue Reading
Advertisement

TRENDING