Fatos Lubonja: Kjo qeveri sot është lakuriq, amerikanët s’po e zhveshin ende mbretin (Ramën)

Fatos Lubonja thotë se me arrestimet e fundit të SPAK qeverisë po i bie fasada. Megjithatë Lubonja nuk është ende i bindur që Prokuroria e Posaçme ka vullnetin e plotë për drejtësi.

“Unë mendoj se tragjedia e Gërdecit dhe “21 Janari” duhet të hetohen. Aty ka një përgjegjësi politike, morale. “21 janari” duhet të hetohet, por edhe 300 protestuesit që sollën kaosin duhet të hetohen. 21 janari dhe Gërdeci janë përdorur politikisht.

Si sistem sot që kanë ngritur për të vjedhur shqiptarët, kjo qeveri është lakuriq. Temën sot e kemi këtu, në këtë lakuriqësi që shohim. Na kujtohet përralla me mbretin lakuriq, që vetëm fëmija i pafajshëm e sheh mbretin që është lakuriq. SPAK duhet të na thotë që “mbreti” është lakuriq apo jo.

Jemi në një sistem, ku ka fasadë, do kesh të pavarur ekonominë. Qeverisë po i bie fasada. SPAK po i zbulon hajdutët dhe të dyja palët nuk e duan. Kjo qëndron pjesërisht. Por unë besoj se jo të gjithë në SPAK janë të vendosur për këtë. Ka aty edhe njerëz të Ramës.

Nëse do bëhej drejtësi tamam këtu, nuk di kush do ngelej jashtë, është problem pastaj për stabilitetin. Edhe amerikanët nuk duan ta zhveshin mbretin plotësisht, se kanë edhe ata interesat e tyre.

Nuk e kuptoj këtë që drejtësia qenka avash-avash, krimineli në rrugë duhet kapur direkt, nuk mund ta lëmë kriminelin akoma të lirë, të bëjë akoma vrasje e krime, atëherë i bie është kalkulim e jo drejtësi” – tha Lubonja