Fërkimi i radhës ngre tensionet në veri, ja çfarë karte po luan Albin Kurti

Një vendim i Bankës Qendrore të Kosovës, së fundmi, ka shkaktuar fërkimin politik të radhës në mes të Qeverisë së Kosovës, e cila në emër të ligjit po tenton ta shtrijë sovranitetin në Veri të Kosovës, dhe komunitetit ndërkombëtar, i cili s’do “surpriza” në terren, por zbatim të marrëveshjeve (Asociacionin).

Vendimi i Bankës Qendrore që në Kosovë të përdoret vetëm një valutë, euro, aktualisht ka ngecur në mes thirrjes së komunitetit ndërkombëtar që vendimi të shtyhet për ca kohë, pasi vendimi afekton serbët atje, dhe në anën tjetër arsyetimin e autoriteteve kosovare se vendimi një fjalë është vetëm zbatim i një dispozite të Kushtetutës së Kosovës dhe asgjë tjetër.

Pikërisht për t’u takuar në një pikë të përbashkët në këtë çështje, kryeministri i Kosovës, Albin Kurti u vizitua nga ambasadorët e vendeve të QUINT-it dhe shefi i zyrës së Bashkimit Evropian në Kosovë

Por, ajo çfarë u bë e ditur pas takimit ishte se Qeveria e Kosovës nuk kishte lëvizur aspak nga pozicioni paraprak.

Ambasadorët u deklaruan pas takimit se “Pas një shkëmbimi për këtë çështje me Kryeministrin, QUNIT kërkon pezullimin e zbatimit të rregullores për të mundësuar një periudhë mjaft të gjatë tranzicioni dhe për komunikim të qartë dhe efektiv public”. Gjermania gjithashtu ka kërkuar që Qeveria e Kosovës ta shtyjë vendimin.

Në thirrjen e Gjermanisë janë bashkuar paraprakisht edhe Shtetet e Bashkuara të Amerikës dhe BE-ja. Megjithatë, Kosova është e vendosur të mos e marrë parasysh apelin e ndërkombëtarëve, duke patur parasysh deklaratën e zv kryeministrit Besnik Bislimi:

“Kushtetuta, ose është e shenjtë, dhe duhet të zbatohet. Nëse duhet të zbatohet, atëherë insistoni që të zbatohet në të gjitha rastet”

Sipas ligjëruesit të Shkencave Politike, Dritëro Arifi, me këtë veprim, Kosova po po shtron trasenë në rrugën drejtë themelimit të Asociacionit të Komunave me Shumicë Serbe.

“Unë besoj që është një vendim politik, i cili nuk do ta pengojë dialogun, por përkundrazi. Kjo mund të jetë shtytje për ta bërë Asociacionin e Komunave me Shumicë Serbe – pra nëse ne marrim diçka, duhet të japim diçka – në njëfarë mënyre, ky është një justifikim para publikut që do të përshpejtohet zbatimi i marrëveshjes” – konsideroi Dritëro Arifi.