Franca sfidon SHBA/ Macron i bindur: Nuk pranojmë tarifat amerikane, përgjigjja do të jetë e fortë

Presidenti francez Emmanuel Macron ka bërë thirrje për pezullimin e investimeve franceze në Shtetet e Bashkuara derisa të ketë “sqarime të mëtejshme” mbi tarifat amerikane.

Duke pritur sipërmarrësit francezë në Elysee, Macron paralajmëroi një përgjigje të fortë evropiane, duke mos përjashtuar asnjë opsion për masa hakmarrëse.

Ndërkohë, burime nga Bashkimi Evropian kanë bërë të ditur se kundërmasat e para ndaj politikave tregtare të SHBA-së priten të hyjnë në fuqi nga 15 prilli, me një valë të dytë masash në muajin maj. Ministri italian i Jashtëm, Antonio Tajani, ka sugjeruar se përgjigja evropiane do të jetë e kujdesshme dhe më pak agresive se ajo e Francës, duke lënë të hapur hapësirën për negociata.

Ndërsa tensionet mes dy blloqeve rriten, tregjet financiare kanë reaguar me lëkundje të forta, duke rezultuar në një humbje prej 2 trilion dollarësh në Wall Street, mes shqetësimeve për një luftë tregtare të zgjeruar midis SHBA-së dhe Evropës.