Ftesë nga pesë/ Tani ose kurrë… kërkesa dhe afate specifike

Të dërguarit perëndimorë që do të vijnë në Kosovë e Serbi, do ti kërkojnë dy vendeve që “të angazhohen shumë më seriozisht në zbatimin e Marrëveshjes së Ohrit”.

Uashingtoni, Parisi dhe Berlini po llogarisin në vazhdimin e dialogut me ndërmjetësimin e BE-së dhe në përputhje me rrethanat do t’i bëjnë presion kryeministrit Albin Kurti dhe presidentit Aleksandër Vuçiç, që të kthehen në tryezën e bisedimeve.

“Ngjarjet e fundit në Kosovë, të cilat kanë ndryshuar në mënyrë dramatike atmosferën, do t’i detyrojnë vizitorët të kërkojnë veprime konkrete: që Beogradi të dënojë fuqishëm dhe pa mëdyshje incidentin e fundit të armatosur, si dhe që të dyja palët të angazhohen shumë më seriozisht në zbatimin e Marrëveshjes së Ohrit” – Shkruan ‘Demostat’  duke iu referuar burimeve nga qarqet diplomatike perëndimore.

Po të njëjtat burime citohet të kenë thënë se “pesëshja e madhe” vjen në Prishtinë e Beograd me “kërkesa dhe afate specifike”, si dhe për të “prezantuar pasoja specifike nëse refuzojnë zbatimin e marrëveshjes”.

Zëdhënësi i Bashkimit Evropian, Peter Stano, i tha agjencisë Beta se 5 të mëdhenjtë po shkojnë në bisedime “me pritshmëri të qarta që të dyja palët të vazhdojnë procesin e normalizimit të marrëdhënieve dhe të zbatojnë detyrimet e tyre pa vonesë dhe pa kushte”.

Johanna Deimel, analiste e pavarur gjermane për Ballkanin Perëndimor dhe Evropën Juglindore, tha për ‘Demostat’ se fakti që “Quinti, pavarësisht luftërave në Ukrainë dhe në Lindjen e Mesme, të cilat kërkojnë shumë vëmendje, vendosi që “pesë të mëdhenjtë” të udhëtojnë në Beograd dhe Prishtin, tregon se sa i shqetësuar dhe i rëndësishëm është de-përshkallëzimi. Ky në vetvete është një mesazh shumë i qartë”.

Deimel vlerësoi gjithashtu se “Aleksandër Vuçiç është futur në qoshe pas dhunës në Banjskë”.

“Quinti me siguri do të pyesë veten se deri në çfarë mase Vuçiç mban gjithçka nën kontroll dhe sa i besueshëm është ai. Nuk janë vetëm SHBA-të që kanë deklaruar qartë se përgjegjësit e 24 shtatorit duhet të ndiqen penalisht”, vlerësoi analistja gjermane

Sipas Deimel, fakti që Vuçic zgjodhi udhëtimin në Pekin para samitit që u mbajt në Tiranë dhe se injoroi BE-në dhe vendet fqinje, nuk e ndihmon shumë dhe ai tani ndoshta do të “bie në gjunjë”.

“A dëshiron vërtet Vuçic të anëtarësohet në Bashkimin Evropian? A është ai partneri i duhur? Nëse jo, sigurisht që do të shqyrtohet se në cilat pika, për shembull, mund të përdoren sanksionet e synuara kundër njerëzve të tjerë nga rrethi i ngushtë i Vuçiçit” – theksoi Deimel, sipas së cilës vetëm normalizimi dhe zbatimi i asaj që tashmë është diskutuar dhe rënë dakord do të ndihmojë të dy vendet.

Dragoljub Rasheta, studiues i organizatës “Rruga e Tretë e Re”, beson se lufta në Izrael as nuk do t’i ngadalësojë e as nuk do t’i shpejtojë proceset lidhur me çështjen e Kosovës.

Sipas tij, normalizimi i marrëdhënieve ndikohet më shumë nga gjëra të tjera.

“Shohim se Franca ka kercenuar me pezullimin e liberalizimit te vizave për Prishtinën sepse dialogu nuk po përparon. Mendoj se proceset e normalizimit të marrëdhënieve janë më të ndikuar nga Beogradi dhe Prishtina se sa nga lufta në Izrael dhe nuk do të ketë normalizim të plotë të marrëdhënieve sepse afati për këtë është shumë i shkurtër, pasi vitin e ardhshëm ka zgjedhje edhe në SHBA dhe BE” – theksoi Rašeta.