Golat e Cikalleshit, Sadikut dhe Ajetit/ Lojtarët e kombëtares shqiptare, protagonistë në kampionatet në Turqi, Rumani dhe Indi

Nga Turqia në Rumani, India e Italia: futbollistët kuqezi arritën që të gjenin rrugën e rrjetës. Sokol Cikalleshi rigjen golin në kampionatin turk, i nënti për të me Konyasporin. Sulmuesi kuqezi zhbllokoi shifrat që në minutën e 12-të ndaj Pendiksporit, duke shënuar nga pika e bardhë e penalltisë.

Rekord për Cikalleshin, i cili u bë lojtari i huaj me më shumë gola në historinë e Konyasporit, me plot 27 në total. Skuadra e tij fitoi 0-2, teksa pas sulmuesit kavajas festoi edhe Valon Ethemi. Fitore me shumë vlera për Konyan, pasi më në fund ekipi u largua nga zona e rënies. Në Rumani ka impresionuar Arlind Ajeti. Mbrojtësi i kombëtares së Shqipërisë realizoi një gol mjaft të bukur në ndeshjen Farul Constanta-Cluj që përfundoi 1-1. Mbrojtësi i kombëtares kuqezi që aktivizohet me Cluj u shpall dhe njeriu i ndeshjes falë paraqitjes së shkëlqyer që bëri.

Armando Sadiku po ashtu u rikthye te goli, teksa realizoi në fitoren 3-0 të Mohun Bagan ndaj Jamshedpur. Sulmuesi kuqezi u aktivizua në minutën e 70-të dhe vulosi fitoren e Mohun Bagan me golin e tij të dhjetë minuta pasi kishte zbritur në fushë. Në Serie C vijon të shkëlqejë Cristian Shpendi, i cili shënoi edhe në duelin mes Cesenas dhe Entellas I cili përfundoi 4-0. Golashënuesi më i mirë i këtij divizioni, realizoi golin e dytë të bardhezinjve kryesues. 20-vjeçari numëron 17 gola në këtë kampionat. Mjaft mirë bëri edhe Ernest Muçi në derbin kundër Galatasarayt. Sulmuesi pogradecar tregoi klasin e tij dhe vetëm goli i mungoi në duelin që bardhezinjtë e Besiktasit humbën 0-1.

Titullarë me skuadrat e tyre u aktivizuan edhe Elhan Kastrati, Ivan Balliu, Berat Gjimshiti, Ardian Ismajli, Mario Mitaj, Ylber Ramadani, Keidi Bare, Qazim Laçi, Myrto Uzuni, Taulant Seferi, Arbnor Muçolli, Mirlind Daku dhe Rey Manaj.