Histori filmash/ Si ‘mbreti i kokainës’ bleu gjyqtarë dhe zyrtarë burgjesh për t’u arratisur

“Dritan Rexhepi, ose Lulëzim Murataj, i njohur si “mbreti i kokainës”, ka përdorur mekanizma të ndryshme dhe të sofistikuara për t’iu shmangur autoriteteve ekuadoriane dhe për t’u arratisur nga vendit”, kështu e ka nisur shkrimin e saj, media infobae.com.

Rexhepi ka vuajtur dënimin me burg në Ekuador që nga viti 2004 pasi akuzohej për trafik droge, por u lirua në vitin 2011, teksa pjesën e mbetur të dënimit 13 vjeçar, Rexhepi do ta vuante jashtë burgut, në arrest shtëpie.

Sipas mediave, edhe pse gjyqtari i çështjes në fjalë ka vendosur disa masa për shqiptarin, asnjëra nuk është përmbushur, teksa nga informacionet zyrtare bëhet e ditur se në favor të Rexhepit kanë vepruar mbrojtësi publik, gjyqtari, zyrtarët e burgjeve dhe mjekët publikë.

Mbi Rexhepin ka dy kërkesa ekstradimi nga Shqipëria dhe Italia. Ndërkohë në vitin 2015, kur Rexhepi u dënua me 14 vite burg, Gjykata Kombëtare e Ekuadorit vendosi që shqiptari të ekstradohet sapo të përfundojë dënimin në Ekuador.

Disa dokumente të gjykatës italiane e identifikojnë Rexhepin, tani 42 vjeç, si mbreti i padiskutueshëm me akses në sasi të pafundme kokaine nga Kompania Bello, një kartel i përbërë nga 14 banda kriminale shqiptare të përfshira në trafikun e drogës dhe që, sipas autoriteteve, ai kishte funksionuar që nga viti 2014 në Ekuador, Holandë, Belgjikë, Shqipëri dhe Itali, siç u publikua në nëntor 2021 nga The Eall Street Journal .

Infobae , si dhe disa media anglo-saksone, në nëntor të vitit 2022 dhe në mars të këtij viti njoftuan se Rexhepi nuk ishte më në Ekuador dhe se dikush kishte firmosur për të në të dhënat pranë organit kompetent.

Ky informacion u ratifikua nga Shërbimi i Kujdesit Gjithëpërfshirës (Snai), institucioni përgjegjës për burgjet në Ekuador, përmes një pakete dokumentesh për Rexhepin, dorëzuar presidentit të Komisionit të Mbikëqyrjes së Kongresit, Fernando Villavicencio. Ky medium ka mundur të qaset në të gjithë dokumentacionin zyrtar për rastin. Janë disa parregullsi që ishin të njohura për qeverinë dhe autoritetet gjyqësore.

Kur Rexhepi kërkoi lirimin paraprak, ai argumentoi se vuante nga lupus eritematoz sistemik, një sëmundje e pashërueshme dhe inflamatore në të cilën sistemi imunitar sulmon indet e veta dhe prek nyjet, lëkurën, veshkat, qelizat e gjakut, trurin, zemrën dhe mushkëritë.

Në vitin 2021, gjyqtari i garancive penale, Diego Poma, i akuzuar për favorizimin e trafikantëve të tjerë ekuadorianë të drogës të lidhur me kartelin Sinaloa, pranoi kërkesën e Rexhepit dhe vendosi se e drejta e shqiptarit për shëndetin mbizotëronte mbi ndalimin e tij për të mos lejuar ekstradimin e tij me përfundimin e dënimit të tij.

Sipas të dhënave të rastit, Rexhepi nuk ka mundur t’i qaset kujdesit apo mjekimit të nevojshëm për sëmundjen e tij në burg.