Historia e rrallë: 20 vite burg për vdekjen e 4 fëmijëve të saj, nëna lirohet pas provave të reja

Një grua australiane që kaloi dy dekada në burg pasi u dënua për vrasjen e katër fëmijëve të saj u fal dhe u lirua nga burgu të hënën, pasi një hetim zbuloi se kishte ‘dyshim të arsyeshëm’ se ajo nuk ishte përgjegjëse për vdekjen e fëmijëve.

Kathleen Folbigg ka pretenduar pafajësinë që kur u akuzua për vrasjen e fëmijëve të saj, të cilët vdiqën të gjithë në moshë të re nga fundi i viteve 1980 dhe fundi i viteve 1990.

Vitet e fundit, janë ngritur dyshime për çështjen me shfaqjen e shkencës së re. Prokurori i Përgjithshëm i Uellsit të Ri Jugor, Michael Daley, tha në një konferencë për shtyp se ai kishte rekomanduar që guvernatori i shtetit të falte Folbigg dhe ajo do lirohej menjëherë. Ai u njoftua javën e kaluar ndërsa raporti i një hetimi për dënimin e saj po përmbyllej.

Daley tha se ai mori një memorandum të premten nga Thomas Bathurst, një ish-gjyqtar i lartë që drejtoi hetimin, duke deklaruar se kishte ‘dyshim të arsyeshëm’ për secilën nga veprat e supozuara.

Shkencëtarët e gjenetikës kanë gjetur mutacione të rralla në ADN-në e Folbigg dhe vajzave të saj që mund të shkaktojnë vdekje të papritur në foshnjëri dhe fëmijëri, dhe variante të tjera të gjetura në ADN-në e djemve të saj kanë qenë gjithashtu të lidhura me vdekjet tek fëmijët e vegjël.

“Dallimi midis sot dhe asaj që ka ndodhur në të kaluarën është se provat e reja kanë dalë në dritë,” tha Daley, një anëtar i Partisë Laburiste të qendrës së majtë, duke shtuar se ishte ‘e përshtatshme që ne të kemi mekanizma për të rishqyrtuar këto lloj pyetjesh në dritën e provave të reja’.

“Jam i lehtësuar që Kathleen Folbigg-ut i është dhënë një falje e pakushtëzuar dhe se shkenca është dëgjuar”, tha Chennupati Jagadish, president i Akademisë Australiane të Shkencave, i cili këshilloi hetimin e Bathurst.

Akademia shtoi në një deklaratë se dëshironte të punonte me zyrën e Daley për të ‘zbatuar një sistem ligjor më të ndjeshëm ndaj shkencës, në mënyrë që një gabim i drejtësisë i kësaj shkalle të mos përsëritet kurrë’.

Ndërsa falja do të thotë se Folbigg nuk do duhet të vuajë pjesën e mbetur të dënimit të saj, ajo nuk e liron atë nga dënimet penale. Një gjykatë penale e apelit do të duhet t’i rrëzojë këto dënime, tha Daley, duke shtuar se një apel i suksesshëm do krijonte një rrugë për Folbigg për të filluar një proces civil kundër shtetit për kompensim.

Përfaqësuesit për Folbigg nuk iu përgjigjën menjëherë kërkesave për koment në lidhje me faktin nëse ajo kishte në plan të ngrejë padi kundër qeverisë për paraburgimin e saj prej dy dekadash.

Folbigg u lirua nga Qendra Korrektuese Clarence, rreth gjashtë orë me makinë larg nga Sydney, rreth orës 11 të mëngjesit me orën lokale, sipas Sydney Morning Herald.

I pyetur për përgjigjen e tij ndaj njerëzve që mund të mos besojnë në pafajësinë e Folbigg-ut, Daley tha: “Kemi katër fëmijë të vegjël që kanë vdekur. Ne kemi një burrë dhe një grua që humbën njëri-tjetrin, një grua që kaloi 20 vjet në burg dhe një familje që nuk pati kurrë një mundësi. Nuk do ishe njeri nëse nuk do ndjeje diçka për këtë,” tha ai.