I kërkuar nga policia/ Lici sfidon hapur, publikon foton

Ibrahim Lici është një nga personat më të kërkuar nga policia në Shqipëri, por është duke e sfiduar këtë të fundit, hapur fare. E themi këtë, pasi pak ditë pasi policia njoftoi se Lici është lokalizuar dhe po punohet për ta kapur atë në shtetin turk , ky i fundit ka publikuar një foto krah vëllait të tij në Stamboll.

Më herët ditën e sotme, shkodrani, deklaroi për mediat se ai është i lirë dhe nuk ka lidhje me asnjë vrasje për të cilat ai kërkohet. Ibrahim Lici akuzohet si person i përfshirë në vrasjen e Endri Mustafës dhe dy vëllezërve Astrit dhe Brahim Bilali. Ai shprehet se nuk ka pasur kurrë konflikt me këta persona dhe nuk e kupton pse po kërkohet nga policia.

“Jam i lirë. Nuk jam arrestuar. Lidhur me ngjarjen për të cilën akuzohem për vrasjen e Endri Mustafës, kam dorëzuar kamerat në Prokurori dhe qelizat telefonike që vërtetojnë që unë kam qenë në Tiranë në momentin që ka ndodhur krimi. Kjo është e vërtetuar me pamje dhe qeliza telefonike. Unë pres vendimin e gjykatës për të zbardhur ngjarjen dhe për të çuar përpara drejtësisë autorët e vërtetë. Edhe për vrasjen e vëllezërve Bilali nuk kam qenë asnjëherë nën hetim nga Prokuroria dhe jam shpallur në kërkim nga policia, pra në kërkim policor si person për t’u marrë në pyetje vetëm se nuk jam gjetur në banesë. Nuk kam patur asnjëherë konflikt me vëllezerit Bilali. Shumë e çuditshme të kërkohet ekstradimi im në një kohë që nuk jam arrestuar dhe i bëj thirrje policisë të dalin në deklaratë se ku dhe kur më ka arrestuar sepse unë jam i lirë dhe në pritje në drejtësisë. Jetoj i lirë në Turqi dhe pres të zbardhet ngjarja. Fotot e mia tregojnë qartë jetën e lirë që bëj në shtetin turk.” – u shpreh Lici për mediat ditën e sotme.