Inceneratori i Tiranës/ Berisha: Veliaj dhe Rama autorët kryesorë të vjedhjes

Ish-kryeministri Sali Berisha në një komunikim për mediat ka denoncuar sërish Inceneratorin e Tiranës. Berisha ka bërë përgjegjës kryeministrin Edi Rama dhe kreun e Bashkisë së Tiranës për këtë aferë, të cilën e quan; ‘projekti i vjedhjes së shekullit”.

“Vapa e gushtit ra, por flakët e djegësit të Tiranës që nuk ekziston bëhen më përvëluese. Të dhëna origjinale faktojnë se Erion Veliaj është autori kryesor së bashku me Edi Ramën i vjedhjes së shekullit me inceneratorin e Tiranës. Të dhënat disponohen nga Prokuroria Speciale dhe dëshmojnë se jo një, por gjashtë herë Ministria e Financave fillimisht Shkëlqim Cani dhe më vonë Ahmetaj kanë refuzuar kërkesën e përsëritur prej gjashtë herësh të ndërtimit të djegësit të Tiranës, si një kërkesë të papërballueshme nga pikëpamja financiare”, ka thënë Berisha.

Më tej ish-kryeministri ka akuzuar kryebashkiakun Veliaj se i ka dërguar shkresë mikut të tij Alqi Bllako, ndërsa foli edhe për një video që qarkullon sipas duke i thurur lavde njëri-tjetrit.

“Duke patur si ndërmarrje të vetën djegësin e Tiranës, Erion Valiaj lejoi fillimin e punimeve dhe të pagesave pa u firmosur leja e ndërtimit. Në 17 maj kur Veliaj ka filluar punimet, dhe disbursimin e fondeve po në këtë periudhë, Këshilli Kombëtar ka vendosur nja dy apo tre kushte për fillimin e punimeve. Por asnjë nga kushte nuk është përfillur dhe punimet kishin filluar shumë më herët”, tha ai.