“Interi shumë i fortë, por e merituam fitoren”, Zidan: Ka gjithmonë tension në ndeshje të tilla

Zinedin Zidan largohet i lumtur nga fitorja me Interin dhe thotë se skuadra tregoi karakter duke reaguar në momentin më të vështirë të mundshëm. Trajneri francez vlerësoi maksimalisht Interin për ndeshjen e zhvilluar, por gjithashtu edhe futbollistët e tij që besuan deri në fund dhe arritën të merrnin 3 pikët e vështira.

ANALIZA – “Gjithmonë ka tension në ndeshje të tilla, sepse rivali ishte i fortë. Vuajtëm, por duhet të falënderoj lojtarët sepse e merituan këtë fitore. E nisëm mjaft mirë, duke bërë presing larg dhe kjo është ajo që duhet. Shënuam dy gola, por pësuam shpejt dhe kishim vështirësi për të vazhduar futbollin tonë. Pjesa e dytë ishte e balancuar”.

RODRIGO – “Goli i tij ishte shumë i bukur sepse dolën shumë shpejt në kundërsulm edhe pse kundërshtari është i zoti fizikisht. Na krijuan probleme”.

ZËVENDËSIMET – “Hazard dhe Asensio bënë ndeshje të mirë, por duhet të jemi të kujdesshëm me ta sepse rikthehen nga dëmtimet. Duhet të besonim deri në fundin e kësaj ndeshjeje. Largohem shumë i kënaqur”.

RAMOS – “E dimë çfarë lojtari është dhe çfarë mund t’i sjellë skuadrës. Jam i kënaqur me performancat e tij”.

ARSYET – “Ekipi ka karakter dhe duan të tregojnë në fushën e lojës që munden. Do të kemi vështirësi në të gjitha ndeshjet e ardhshme, por nuk shoh ndonjë ekip që të fitojë lehtësisht”.

PARAQITJA – “Ky është Champions-i dhe është i balancuar. Kemi bërë një ndeshje të mirë sepse e nisëm mjaft mirë. Në pjesën e dytë patëm vështirësi, por është normale. Luftuam deri në fund dhe e merituam fitoren”.

MBROJTJA – “Është e vërtetë që jemi më të brishtë në mbrojtje dhe duhet të ruajmë ekuilibrat. Por gjithashtu nuk duhet të harrojmë që luajmë ndaj një kundërshtari, i cili është i fortë në kundërsulm. Por kishte kohë që nuk shënonim të parët dhe kjo është diçka pozitive. Duhet të vazhdojmë të punojmë akoma më shumë sepse nuk është e lehtë t’i bësh të dyja gjërat, të shënosh dhe të mos pësosh”.

MARADONA – “Shpresoj që gjithçka të shkojë mirë. Të gjithë e dimë se çfarë futbollisti është. Uroj më të mirat për të”.

“Panorama Sport“