Izraeli kritikon portretin e Netanyahut të varur në vinç në Turqi

Një kukull që i ngjan kryeministrit izraelit Benjamin Netanyahu u pa e varur nga një vinç ndërtimi në verilindje të Turqisë, duke shkaktuar zemërim në Izrael.

Sipas mediave turke, incidenti ndodhi të shtunën në një kantier ndërtimi në qytetin Trabzon të Detit të Zi. Thuhet se u organizua nga Kemal Saglam, një profesor i komunikimit vizual në një universitet lokal. Saglam u tha mediave lokale se akti ishte simbolik dhe kishte për qëllim të tërhiqte vëmendjen ndaj shkeljeve të të drejtave të njeriut në Gaza.

Imazhet që u bënë virale dhe u botuan gjithashtu nga e përditshmja turke Yeni Safak tregojnë figurën e varur nga një vinç, me një banderolë që shkruante: “Dënim me vdekje për Netanyahun”.

Ministria e Jashtme e Izraelit, duke shkruar në X, postoi një video të incidentit, duke pretenduar se një akademik turk krijoi kukullën “me mbështetjen krenare të një kompanie shtetërore”. Ministria e dënoi shfaqjen, duke thënë se  “autoritetet turke nuk e kanë denoncuar këtë sjellje të turpshme”.

Zyrtarët turq ende nuk kanë dhënë një përgjigje zyrtare.

Marrëdhëniet diplomatike midis Izraelit dhe Turqisë kanë qenë të tendosura për vite me radhë dhe janë përkeqësuar pas sulmeve të Hamasit më 7 tetor 2023. Presidenti Rexhep Tajip Erdogan e ka akuzuar Netanyahun për kryerjen e “gjenocidit” në Gaza.

Turqia ka qenë e përfshirë në mënyrë aktive në negociatat e fundit për armëpushim dhe pengje, me disa raporte që tregojnë se ndikimi i Ankarasë mbi Hamasin ndihmoi në lehtësimin e lirimit të pengjeve si pjesë e planit 20-pikësh të Presidentit të SHBA-së Donald Trump.

Erdogan u tha gazetarëve të premten se SHBA-të duhet të bëjnë më shumë presion mbi Izraelin, duke përfshirë sanksionet dhe ndalimet e shitjes së armëve, që të përmbushë angazhimet e tij në planin e Trump.

Të dielën, Netanyahu tha se Izraeli do të vendosë se cilat forca të huaja mund të marrin pjesë në një mision ndërkombëtar të propozuar në Gaza për të ndihmuar në sigurimin e një armëpushimi sipas planit të Trump. Javën e kaluar, ai la të kuptohej se do të kundërshtonte çdo rol të forcave turke të sigurisë në Gaza.