Izraeli nis fazën e dytë/ “Qerret e gideonit” rikthehen për të shkatërruar Hamasin!

Forcat Mbrojtëse Izraelite (IDF) kanë njoftuar se operacioni i tyre për të eliminuar Hamasin, “Qerret e Gideonit”, po hyn në fazën e tij të dytë, pavarësisht pretendimeve se plani ishte konsideruar i dështuar nga komanda.

“Ne kemi hyrë në fazën e dytë të Operacionit “Qerret e Gideonit” për të arritur objektivat e luftës. Kthimi i pengjeve tona është një detyrë morale dhe kombëtare. Ne do të vazhdojmë operacionet kundër fortesave kryesore të Hamasit deri në disfatën e tij”, shkroi IDF në një postim në X.

Në postimin e tyre, ata publikuan edhe një foto të Shefit të Shtabit të Përgjithshëm të Izraelit, Eyal Zamir, nga një vizitë në terren pranë Qytetit të Gazës sot.

Disa ditë më parë, u publikua një dokument i klasifikuar i ushtrisë izraelite, i cili arriti në përfundimin se operacioni ushtarak “Qerret e Gideonit”, ofensiva në shkallë të gjerë e nisur nga ushtria izraelite kundër Hamasit në maj, nuk i arriti objektivat e tij kryesore. Sipas një pjese të dokumentit të publikuar nga Channel 12, operacioni ushtarak nuk arriti asnjë nga objektivat e tij, përkatësisht përmbysjen e Hamasit ushtarakisht ose lirimin e pengjeve.