Kamberi: Vuçiçi sikurse Millosheviçi, Perëndimi ende s’ka gjetur alternativë

Deputeti nga radhët e Partisë për Veprim Demokratik në Parlamentin e Serbisë, Shaip Kamberi, ka thënë se Bashkimit Evropian dhe Shtetet e Bashkuara të Amerikës nuk kanë gjetur akoma një alternativë politike ndaj presidentit serb, Aleksandër Vuçiç, teksa dhe ka shtuar se ndikimi rus në Serbi vijon të mbetet mjaft i madh.

Në një intervistë për “Albanian Daily News” deputeti shqiptar ka theksuar se ndryshimi cilësor në Serbi mund të ndodhë vetëm atëherë kur Perëndimi do identifikojë dhe do të bashkëpunojë me politikanët liberalë dhe e ka krahasuar presidentin aktual me ish-udhëheqësin fashist të Serbisë, Sllobodan Millosheviç, posaçërisht në lidhje me politikën e jashtme.

“Perëndimi as që po punon për të ndërtuar një alternativë tjetër politike pro-evropiane. Vuçiçi e di mirë këtë, prandaj ai ka komoditetin për të balancuar presionin perëndimor” – ka theksuar ligjvënësi i vetëm shqiptar në parlamentin serb.

Zgjedhjet e reja parlamenare në Serbi, sipas deputetit Kamberi, nuk do të ndryshojnë skenën politike në Beograd dhe nuk do të sjellin një qasje të re ndaj problemeve kryesore. Në fakt, sipas tij, zgjedhjet janë një mundësi për Vuçiçin për të blerë kohë për “tema të nxehta” sikurse Kosova, sanksionet kundër Rusisë dhe demokratizimi i brendshëm.