Katastrofa natyrore në Paqësor, valët e cunamit godasin Kaliforninë dhe Hawaiin pas tërmetit masiv në Rusi

Një tërmet me magnitudë 8.8 ballë, një nga më të fuqishmit e regjistruar ndonjëherë, ka goditur lindjen e largët të Rusisë, duke shkaktuar një cunami.

Tërmeti i fuqishëm deri më tani ka shkaktuar cunami në Rusi, Japoni, Alaska, Hawaii, Kaliforni dhe shtete të tjera të SHBA-së, ndërsa paralajmërime janë lëshuar edhe për vende të tjera, përfshirë Kilin, Kosta Rikën, Polinezinë Franceze dhe Kinën.

Në qytetin rus Severo-Kurilsk, në pjesën veriore të Ishujve Kuril, valët e cunamit arritën më shumë se 3 metra, me valën më të fortë që arriti në 5 metra. Ujërat e përmbytjes mbuluan disa ndërtesa dhe në zonë u shpall gjendja e jashtëzakonshme. Zonat bregdetare në Japoni janë evakuuar dhe janë regjistruar valë deri në 1.3 metra.

Cunami ka arritur tashmë në Alaska, Hawaii, Kaliforni, Oregon dhe Uashington.

Në Hawaii, i cili fillimisht kishte nivelin më të lartë të paralajmërimit përpara se të ulej, vala më e madhe u regjistrua në bregdetin jugor të Maui dhe ishte 1.74 metra e lartë.