Kërkon falje nëpërmjet një letre, turisti që gdhendi emrin e tij në…

Turisti bullgar me banim në Britaninë e Madhe, i cili gdhendi emrin e tij dhe të së dashurës në Koloseumin e Romës, ka kërkuar falje nëpërmjet një letre. Pamjet e Ivan Dimitrov duke gdhendur “Ivan+Hayley 23” në strukturën 2000-vjeçare u bënë shpejt virale, duke shkaktuar zemërim.

“E pranoj me turpin më të thellë se vetëm pas asaj që fatkeqësisht ndodhi, mësova për lashtësinë e monumentit”, ka shkruar Dimitrov në një letër drejtuar prokurorisë së Romës dhe kryetarit Roberto Gualtieri. I riu përballet me një dënim deri në 5 vjet burg dhe gjobë prej 16.000 dollarësh për këtë akt.

“I vetëdijshëm për seriozitetin e veprës së kryer, me këto rreshta, dëshiroj t’u drejtoj faljen time më të sinqertë italianëve dhe mbarë botës për dëmin e shkaktuar ndaj një pasurie që në fakt është trashëgimia e gjithë njerëzimit”, ka shtuar Dimitrov.