Kishte dhunuar të atin e Laert Haxhiut/ Dëshmia tronditëse e Tafanit: Kujtim Metën e qëllova deri sa më mbaruan plumbat

Gjatë seancës në GJKKO, i penduari i drejtësisë Artan Tafani, ka rrëfyer edhe atentatin ndaj Kujtim Metës, i cili mbeti i plagosur, ku tha se Laert Haxhiu kishte urdhëruar vrasjen e tij, pasi i kishte dhunuar të atin me grushte.

Tafani deklaroi se në atentat ka marrë pjesë ai vetë në rolin e qitësit, si dhe Lulzim Arapi e Dorian Shurdhi, ku ky i fundit është dhunuar për vdekje në Belgjikë.

I penduari i SPAK tha se në tantativën e parë nuk e kryen dot atentatin, ndërsa tek e dytë e qëlloi deri sa i mbaruan plumbat e pistoletës, teksa Kujtim Meta qëndronte në një kafene, por “shënjestra” hishte hedhur nga karrigia që në gjuajtjen e tij të parë. Gjithashtu Tafani tregoi para togave të zeza se Dorian Shurdhi e shante Laert Haxhiun. “Thoshte do na kalbë në burg”, tha ai.

Artan Tafani: E kishte hapur si muhabet babai i Laertit. Edhe tha ta vrisnim. E kishte rrahur me grushte babin e Laertit. Kërkonte ta vriste me thikë se po të ishte me plumb, do kuptohej që e kishte bërë Laerti. Kishte ardhur Dorian Shurdhi, një i njohur jonë, shoku i Laertit nga Belgjika. Doriani ruante makinën dhe komunikonte me Laertin. Laerti e kishte bërë planin, do veja unë ta godisja.

Do vinte Lulzimi me makinë nga Tirana, te Palma Nova, që të bënim punën e të niseshim për Tiranë. Por nuk e bëmë dot. S’e bëmë se nuk donte Dorian Shurdhi. Doriani e dinte që i shkonin direkt te shtëpia. E shante Laertin, Doriani. Thoshte do na kalbë në burg.

E provuam prapë. Kishim armë zastava që na e kishte dhënë Bledar Berberi për të vrarë Albi Bashaliun. Kujtimi, viktima ishte ulur në një lokal, ngjitur me banakun përballë. Qëllova me armë drejt tij. Sapo godas unë, ky hidhet nga karrigia. Pastaj e qëllova prapë. 8 fishekë që kisha, i qëllova. Ky duke ikur nëpër çimento, unë e qëlloja, sa më mbaruan fishekët. E gjuajta dhe nga mbrapa. Mbaruan fishekët, ika unë. U mundova ta shënjestroj. Mesa dëgjova në lajme e kishte kapur në bark. Ika që aty, kaloi shinat e trenit në këmbë. Aty mbrapa më priste Lulzimi.

Ishe i maskuar?

Artan Tafani: Kisha maskë covidi, kapuç dhe një xhup të madh. Dalim në autostradë kryesore, ndaluam në Çermë, na bëri me shenjë një patrullë. Nuk ndaluam neve. Gjatë rrugës, unë isha mbrapa, Lulzimi në timon. Kalojmë Kavajën. Unë po flisja me Laertin, donte të dinte detajet. Po e pyesja se ku të hedhim armët. Më tha hidhini rrugës ku të mundeni, qëlloi që i hodha tek i njëjti vend ku kisha hedhur të Albi Bashaliut.