Konfuzohet deputeti që do ndryshonte cilësinë e diellit: Ore çfarë po ndodh, se s’po marr vesh gjë?

Njoftimi i Kuvendit se Lulzim Basha është edhe kryetar i grupit parlamentar të Partisë Demokratike, ka sjellë reagime të ashpra nga grupi i Berishës dhe Gaz Bardhit.  2 deputetët, Ferdinand Xhaferri dhe Edi Paloka thanë se Basha nuk është zgjedhur sipas rregullores, madje duke hedhur akuza në drejtim të tij se është i zgjedhur nga socialistët. “A mund të na sqaroni, sepse është hera e parë që po ndodh kjo. Ju na propozuat që Kuvendi do të votojë midis Çuçit dhe Bashës se kush do zgjidhet kryetar i grupit të PS sepse jam shumë konfuz”, tha Xhaferri, i cili që prej kohës kur do ndryshonte cilësinë e diellit, me sa duket nuk kupton më çfarë ndodh në tokë. “Dua t’ju vë para një situatë të tillë, nëse nesër unë mbledh 2000 veta në një sallë dhe e quaj atë Kuvend të PS, zgjidhem vetë kryetar, sekretar, nënkryetar e të tjera me ar mbrapa dhe vij në parlament dhe ju sjell një letër dhe ju them që jam kryetar i grupit të PS-së, kuptojeni kështu këtë situatë dhe mos u bëni qesharake bashkë me ata që e kanë marrë përsipër që të bëhet qesharak”, tha Paloka.