Kontrolli në MEK/ Irani merr hard disqet e muxhahedinëve

Irani u mburr në fillim të korrikut se siguroi të dhëna elektronike të ndjeshme, të sekuestruara gjatë një bastisje të qershorit ndaj një grupi opozitar iranian në Shqipëri, duke shkaktuar zemërim nga grupi iranian Mujahedin-e-Khalq (MEK). Autoritetet shqiptare konfiskuan 150 pajisje kompjuterike nga opozita e MEK-ut, për shkak të aktiviteteve të supozuara të ndaluara politike në shtetin ballkanik, shkruan “Fox News”.

Sipas një raporti të 3 korrikut në Agjencinë e Lajmeve të Republikës Islamike të kontrolluar nga regjimi (IRNA), Sepehr Khalaji, kreu i këshillit të informacionit të Iranit, postoi në Twitter se “një pjesë e disqeve dhe rasteve” nga bastisja në MEK kishin mbërritur në Iran.

IRNA shkroi në një pjesë të parafrazuar të artikullit të saj që i atribuohej Khalaxhit, “ekspertët iranianë u angazhuan në rikuperimin e të dhënave dhe identifikimin e agjentëve të grupit terrorist dhe qelizave sabotuese”. Khalaji tha: “Rezultatet e deritanishme janë premtuese.”  NCRI publikoi një deklaratë, duke kërkuar përgjigje nga Shqipëria dhe SHBA nëse të dhënat e tyre elektronike u dërguan në Teheran.

Ambasada e Shqipërisë në Uashington tha për “Fox News” se “Shqipëria nuk ka marrëdhënie diplomatike me Republikën Islamike të Iranit. Ajo i ndërpreu marrëdhëniet në vjeshtën e vitit 2022, pas sulmit kibernetik kundër infrastrukturës dixhitale dhe sistemeve publike të Shqipërisë, dhe nuk ka asnjë komunikim apo shkëmbim me regjimin iranian”. 

Ambasada shqiptare vijoi: “Pra, jo! Shqipëria nuk i ka ofruar asgjë regjimit iranian. Të gjitha pajisjet e sekuestruara nga Policia e Shtetit Shqiptar gjatë operacionit të kërkimit në kampin e MEK, mbeten në duart e Prokurorit të Posaçëm kundër Krimit të Organizuar dhe Korrupsionit, institucioni përgjegjës për hetimin dhe do të përdoret për qëllimet e hetimit”.

Zëdhënësi shqiptar shtoi: “Duhet theksuar gjithashtu se Shqipëria është një anëtare e NATO-s, një vend kandidat për në BE dhe një partner i ngushtë strategjik i Shteteve të Bashkuara. Në asnjë rrethanë, Shqipëria nuk do të mendonte ndonjë bashkëpunim të tillë me regjimin iranian”.

NCRI shkroi në deklaratën e saj, “Shtetet e Bashkuara dhe Shqipëria duhet të sqarojnë nëse kompjuterët e MEK-ut i janë dorëzuar regjimit iranian… Kjo kërkon një qëndrim të qartë nga kjo qeveri, dhe ne shpresojmë që autoritetet amerikane dhe shqiptare të mohojnë me vendosmëri dhe të sigurojnë transparencë të plotë dhe detaje”.

I pyetur në lidhje me letrën e NCRI-së, një zëdhënës i Departamentit Amerikan të Shtetit i tha “Fox News” se “Shtetet e Bashkuara nuk kishin asnjë rol në ndonjë gjë të tillë, dhe ne nuk kemi asnjë arsye të besojmë se këto pretendime janë të vërteta. 

Siç kemi thënë, më 20 qershor, Policia e Shtetit Shqiptar hyri në kompleksin Mujahedin-e-Khalq (MEK) në Durrës, Shqipëri, për të ekzekutuar një urdhër gjykate. Shtetet e Bashkuara nuk u përfshinë në këtë operacion. Ne mbështesim të drejtën e Qeverisë së Shqipërisë për të hetuar çdo veprimtari të mundshme të paligjshme brenda territorit të saj”.

Zëdhënësi shtoi: “Ju referojmë në Qeverinë e Shqipërisë për çdo informacion të mëtejshëm”. “Fox News” ka rishikuar inteligjencën e re evropiane nga Holanda, Suedia dhe Gjermania që zbuloi se regjimi i Iranit vazhdonte të kryente survejim ndaj disidentëve iranianë dhe MEK-ut.

Një gjykatë belge dënoi një diplomat iranian, Assadollah Assadi, me 20 vjet burg për rolin e tij në një komplot për të bombarduar një konferencë të MEK-ut jashtë Parisit në vitin 2018. Qeveria belge liroi Assadin në maj, në këmbim të një punonjësi belg të ndihmës të marrë peng nga regjimi i Iranit.