Kosova me sytë nga qielli/ Zyrtari i lartë amerikan ka një porosi të veçantë

Ish-zyrtari i lartë i Departamentit Amerikan të Shtetit, Jonathan Moore, duke iu përgjigjur pyetjes nëse me rregulloren e ndalimit të dinarit, ka si strategji të fitojë kohë dhe të zgjasë sa më shumë zbatimin e Bashkësisë së Komunave me shumicë serbe, u shpreh se nuk sheh prova të një strategjie politike pozitive të qeverisë aktuale.

“Asociacioni gjithmonë ka synuar vetëm të pasqyrojë kapacitetet e të gjitha komunave në Kosovë, duke u mundësuar komunave me shumicë serbe të punojnë së bashku. Një strategji e vërtetë politike do të demonstronte respektin e Kosovës për praktikat demokratike dhe institucionet sociale, do të hapte dyert për Asociacionin, do t’i bënte përshtypje partnerëve të saj ndërkombëtarë, do të zbatonte shpejt vendimet gjyqësore si ai në lidhje me Manastirin në Deçan dhe do të inkurajonte rritjen ekonomike përmes mbështetjes së qartë dhe mbresëlënëse për Kosovën. Për krahasim, Shqipëria ofron një model të ndryshëm dhe shumë më efikas në shumë mënyra” – deklaroi ish-ambasadori amerikan në Misionin e Organizatës për Siguri dhe Bashkëpunim në Evropë në Bosnjë dhe Hercegovinë.

Dhe teksa është e rëndësishme që si Shtetet e Bashkuara, BE-ja dhe Britania e Madhe, të jenë të përkushtuara për të mbështetur dialogun mes Kosovës dhe Serbisë dhe ndërsa viti 2024 do të jetë vit zgjedhor në SHBA dhe Bashkimin Europian, Moor u pyet nëse gjithë këto do të ndikojnë në mbarëvajtjen e procesit të dialogut, theksoi: –

“Kur isha në rajon kohët e fundit, më është bërë kjo pyetje për vendin tim shumë herë. Së pari, pavarësisht se kush do të fitojë në Shtetet e Bashkuara të Amerikës në nëntor, mund të dëgjojmë me siguri nga shumë komentues ballkanikë dhe të ashtuquajtur ekspertë gjetkë se Shtetet e Bashkuara e kanë “harruar” ose lënë pas dore Ballkanin, siç do të ndodhë pas zgjedhjeve.

Ne kemi shumë tema me rëndësi jetike në politikën e brendshme, si dhe trajtojmë konfliktet aktuale aktive në Evropë, Lindjen e Mesme dhe Afrikë. Këto konflikte dhe çështje të tjera ndërkombëtare do të vazhdojnë të konkurrojnë për vëmendjen e politikëbërësve. Kjo do ta bëjë edhe më të vërtetë atë që mendoj: hapat pozitivë dhe burrështetasit në Kosovë do të marrin mbështetje pozitive. Askush në Kosovë nuk duhet të presë që bota t’i zgjidhë problemet e tyre”