Kurti i indinjuar pas lirimit të Pantiç

Kryeministri i Kosovës, Albin Kurti ka reaguar i indinjuar për vendimin e Gjykatës për të ndryshuar masën e sigurisë nga arrest me burg në arrest shtëpie për Dejan Pantiç.

Kreu i qeverisë shprehu habinë se kush është ai prokuror dhe gjykatës që lanë të lirë një person të akuzuar për terrorizëm.

Ai e ka statusin e të paraburgosurit por njëkohësisht është i pandehur për terrorizëm.

Ishte në grevë urie dhe kishte probleme në zemër, mund të dërgohej në spital, a është e arsyeshme e vendos gjyqësori, por kur kemi akuzë për terrorizëm, të dërgohesh në arrest shtëpiak, unë jam shumë kureshtar ta di se cili është ai prokuror që bën këtë kërkesë, dhe cili është ai gjyqtar që e aprovon”, tha Kurti.

Dejan Pantiç është një ish efektiv serb i policisë së Kosovës, i cili u arrestua për një sulm ndaj një objekti të KQZ në veri. Arrestimi i tij solli reagimin e serbëve dhe ngritjen e barrikadave të cilat vijojnë të bllokojnë qarkullimin e lirë prej datës 10 dhjetor.

…

Ish-policit serb Dejan Pantiç i është ndryshuar masa e sigurisë. Gjykata Themelore në Prishtinë ka konfirmuar se ish-policit serb, që ndodhej në paraburgim tashmë i është ndryshuar masa e sigurisë në arrest shtëpiak.

Zëdhënësja e Gjykatës në Prishtinë, Mirlinda Gashi tha se ky ndryshim është bërë me kërkesë të Prokurorisë Speciale.

Pantiç, ish-polic i Kosovës, u arrestua më 10 Dhjetor në pikën kufitare të Jarinjës. Sipas autoriteteve të Kosovës, ai dyshohet për organizmin e “sulmit terrorist” të 6 Dhjetorit ndaj zyrtarëve të Komisionit Qendror të Zgjedhjeve.

Arrestimi i Pantiçit, nxiti ngritjen e barrikadave në veri të Kosovës. Barrikadat u vendosën nga disa serbë lokalë, duke bllokuar rrugët që çojnë drejt dy pikëkalimeve kufitare, Jarinjë dhe Bërnjak, që lidhin Kosovën me Serbinë.