Kurti, i vetëm ‘trim në luftë’

Kryemininistri Kurti nuk do Asociacion njëetnik, ndërsa zyrtarët e lartë amerikanë e sigurojnë se nuk do të jetë i tillë. Shefi i Qeverisë i çoi disa ministra dhe shefin e kabinetit të tij në takimin e sotëm të thirrur nga SHBA-ja ku u diskutua për Asociacionin dhe nuk deshi të flasë shumë për këtë. Britanikët po ashtu të martën u tregun të vendosur duke e dhënë një qëndrim origjinal se cfarë nuk do të jetë Asociacioni teksa rikujtuan zotimin e Kosovës për ta themeluar atë. A do t’i mjaftojnë Kurtit garancitë e SHBA-së për ta bërë Asociacionin.
Formimi i Asociacionit të komunave me shumicë serbe, tani është kërkesë eksplicite e Shteteve të Bashkuara të Amerikës. Pasi këshilltari i Departamentit amerikan të Shtetit, Derek Chollet dhe i dërguari i posaçëm i SHBA-së për Ballkanin Perëndimor, Gabriel Escobar të hënën publikuan një shkrim përmes të cilit thanë se ka ardhë koha për ta implementuar marrëveshjen për Asociacionin, edhe Ambasada Amerikane organizoi një takim për këtë çështje.
Në diskutimet e organizuara në ambasadë morën pjesë zyrtarë të Qeverisë së Kosovës, liderë të partive politike, pjesëtarë të shoqërisë civile e diplomat, kurse kryeministri i Kosovës, Albin Kurti dërgoi atje katër ministra dhe shefin e stafit të kabinetit të tij.
Ka të paktën dy vjet që Kurti thotë se s’do të ketë Asociacion njëetnik. Më herët, kësaj bashkësie komunash i referohej thjesht si “Asociacion”, pastaj e ktheu në serbish, duke e thirrur “Zajednicë”. Të jetë pa shkak? Askush nuk e beson…
Në shkrimin e publikuar para dy ditësh, diplomatët amerikanë thanë se “është me rëndësi të vihet në pah se një Asociacion i komunave me shumicë serbe nuk do të ishte njëetnik por edhe me grupe te tjera – si përshembull boshnjakë dhe të tjerë – të drejtat e të cilëve gjithashtu duhet të sigurohen dhe mbrohen.

Anëtarët e Asociacionit, sipas dy amerikanëve, do të ishin zyrtarë lokalë tashmë të zgjedhur si përfaqësues të të gjithë banorëve në komunat e tyre. Ndër shqetësimet kryesore të Gjykatës Kushtetuese të Kosovës ishte çështja se si të sigurohej që Asociacioni mbetet i hapur për të gjitha etnitë dhe të ishte plotësisht brenda strukturës së kornizës ligjore të Kosovës dhe ajo bëri thirrje që propozimi fillestar të përshtatej e të mos hidhej poshtë, si dhe theksoi obligimin për krijimin e një asociacioni të tillë sipas marrëveshjes së Brukselit” – thuhej në shkrimin e Chollet dhe Escobar.
Po ashtu, amerikanët garantuan se Asociacioni “nuk do t’i shtonte Qeverisë së Kosovës një shtresë të re të pushtetit ekzekutiv dhe legjislativ. Ky parim i rëndësishëm, diplomatët kujtuan se “daton që nga propozimi i Ahtisaarit, propozim të cilin Albin Kurti kohët e fundit ka qejf ta përmend shumë here duke e vënë përball planit europian.
“Komunat bashkëpunojnë në bashkëmenaxhimin e juridiksioneve brenda institucioneve dhe strukturave legjitime kosovare. Duke lejuar komunat e caktuara që në mënyrë më efikase të ushtrojnë kompetencat që tashmë i kanë, kjo do të mënjanonte nevojën që qytetarët kosovarë të kërkojnë shërbime nga strukturat paralele ilegale – siç bëjnë shumë veta tani – dhe do të ruante transparencën dhe ligjshmërinë e strukturës së re sipas dhe brenda ligjit kosovar. Dhe çdo mbështetje dhe ndihmë që Serbia do t’ia ofronte komunitetit serb të Kosovës do të duhej të ishte transparente dhe të shkonte përmes këtyre kanaleve legjitime dhe të lejuara”, u tha në shkrimin e Chollet dhe Escobar.
Pas takimit në ambasadë, ambasadori amerikan, Jeffrey Hovenier bëri të qartë se SHBA-ja nuk do lejojë diçka si “Republika Srpska”, e cila bie në kundërshtim me Kushtetutën e Kosovës. Edhe ambasadori britanik në Kosovë, Nicholas Abbott u shpreh se “Nuk bëhet fjalë për krijimin e një enklavë monoetnike”.

E njëjta gjë u theksua edhe në Parlamentin britanik nga ministri për Evropën, Leon Docherty që tha se ndan të njëjtin shqetësim me deputeten Kearns sa i përket Asociacionit dhe tha se s’bëhet fjalë për krijimin e një enklave një-etnike në Kosovë.
Po a do t’i mjaftojnë Kurtit këto garanci? Kryeministri nuk e ka komentuar shumë këtë temë, veçse ka përsëritur se “Beogradi dëshiron një ‘Republika Srpska’ brenda Kosovës, siç e ka në Bosnjë”.
Me të drejtë lind pyetja, hezitimi i Albin Kurti është hezitim, kujdes, vigjilencë apo e ka ndarë mendjen, nuk do ketë asociacion, pavarësisht gjithçkaje dhe përballjes i vetëm kundër të gjithëve.