Arrestimi i Metës/ SPAK: Pesë shtete bashkëpunuan për arrestimin e kreut të PL

Ditën e sotme Struktura e Posaçme Kundër Korrupsionit dhe Krimit të Organizuar (SPAK) lëshoi një urdhër për arrestimin e Presidentit të Partisë së Lirisë, Ilir Metës. Pas arrestimit ka ardhur edhe një njoftim nga SPAK ku njofton se ka bashkëpunuar me plot pesë shtete të tjera që kërkokin arrestimin e Metës.

Shtetet e Bashkuara të Amerikës, Austria, Italia, San Marino dhe Qipro kanë qënë shtete që kanë kërkuar arrestimin e tij dhe që kanë bashkëpunuar me SPAK për të vënë në pranga ish-presidentin e Republikës së Shqipërisë, Ilir Metën.

Gjithashtu në njoftim thuhet se bashkë më urdhrin e arrestit ndaj Metës janë ekzekutuar edhe disa masa sigurie për tre persona të tjerë.

Njoftimi:

Po në datën 20.10.2024 Prokuroria e Posaçme ka urdhëruar Drejtorinë e Përgjithshme të Policisë së Shtetit që të ekzekutojë masat e sigurimit të caktuara me vendimin nr.125 datë 20.10.2024. Policia e Shtetit ka ekzekutuar sot në datën 21.10.2024 masat e sigurimit të mësipërme ndaj katër personave nën hetim.

Hetimet vazhdojnë me administrimin e provave sa i përket implikimit të personave të tjerë që dyshohet se janë të përfshirë në këtë veprimtari të paligjshme kriminale.

Gjejmë rastin që të falenderojmë Drejtorinë e  Përgjithshme të Policisë së Shtetit si dhe autoritetet e zbatimit të ligjit të Shteteve të Bashkuara të Amerikës, Austrisë, Italisë, San Marinos, Qipros për ndihmën dhe bashkëpunimin e treguar.

Presidenti i Partisë së Lirisë, Ilir Meta akuzohet për 3 vepra penale: korrupsion, pastrim parash dhe mosdeklarim pasurish. Por Meta nuk është i vetmi që ka rënë në rrjetën e SPAK. Në “arrest shtëpie” është caktuar Pirro Xhixho (babai i Erisa Xhixhos), ndërsa Monika Kryemadhi dhe Ema Çomo janë lënë në “detyrim paraqitje”.