Louvre, i pambrojtur: Fjalëkalimi i kamerave të sigurisë ishte “Louvre”

Nëse ndonjëherë keni dyshuar se institucionet më të mëdha në botë janë të paprekshme, historia e fundit e Louvre-it do t’ju bëjë të mendoheni dy herë.

Gazeta franceze Libération ka zbuluar se qasja në të gjitha kamerat e sigurisë të muzeut më të famshëm në botë ishte e mbrojtur me një fjalëkalim që do ta gjenin edhe turistët më të hutuar: “Louvre.”

Po, as më shumë, as më pak – emri i vetë muzeut.

Skandali nuk ndalet me kaq. Sipas raportit, sistemi i monitorimit të Louvre-it vazhdonte të funksiononte në Windows Server 2003, me softuer të blerë më shumë se dy dekada më parë. Ky version është pa mbështetje sigurie që nga viti 2015 – një boshllëk që ekspertët e kibernetikës e konsiderojnë “ftesë të hapur për sulm”.

Pavarësisht paralajmërimeve të brendshme, administrata e muzeut mendohet se ka refuzuar përditësimin, duke e konsideruar sistemin “të qëndrueshëm” dhe “pa rrezik”. Rezultati ishte i parashikueshëm: një shkelje masive sigurie që komprometoi të dhëna të ndjeshme dhe sistemet e kamerave.

Ngjashmëria me një tjetër rast të bujshëm është tronditëse. Vetëm pak muaj më parë, hakerë bjellorusë depërtuan në rrjetet e Aeroflot, linjës ajrore kombëtare ruse, pasi zbuluan se fjalëkalimi i administratorit ishte po aq absurd – dhe sistemet e tyre funksiononin ende në Windows XP e Server 2003.

Në të dyja rastet, fjalëkalimet bazike dhe teknologjitë e vjetruara janë kthyer në portë të hapur për sulme kibernetike.

Ekspertët thonë se këto incidente tregojnë mungesën e theksuar të kulturës së sigurisë në institucionet publike, madje edhe në ato me rëndësi botërore.