Lufta Ukrainë-Rusi/ Putin: Gati për të folur edhe me Zelenskyn, riarmatimi i NATO-s nuk është kërcënim

Riarmatimi i NATO-s nuk përbën një “kërcënim” për Rusinë sepse vendi ka “aftësitë mbrojtëse” të nevojshme për t’iu kundërvënë asaj. Presidenti rus Vladimir Putin e tha këtë gjatë një takimi në Shën Petersburg me disa agjenci lajmesh të huaja. “Ne nuk e konsiderojmë riarmatimimin e NATO-s një kërcënim për Federatën Ruse, sepse jemi të vetëmjaftueshëm në aspektin e sigurisë”, tha Putin.

“Ne po përmirësojmë vazhdimisht forcat tona të armatosura dhe aftësitë tona mbrojtëse”, shtoi presidenti rus.

Putin: “Gati për t’u takuar me Zelenskyn në fund të negociatave”

Presidenti rus Vladimir Putin, në një takim me agjencitë kryesore ndërkombëtare, tha se ishte gati të takohej me Presidentin ukrainas Volodymyr Zelensky, por vetëm në fazën përfundimtare të negociatave për t’i “dhënë fund” konfliktit. Kjo u raportua nga agjencia Interfax. Por “pyetja është se kush do ta nënshkruajë” marrëveshjen, shtoi shefi i Kremlinit, duke hedhur dyshime mbi legjitimitetin e Zelenskyt, mandati i të cilit skadoi në maj 2024 pa zgjedhje për shkak të ligjit ushtarak.

Kremlini: “Trump nuk pati një bisedë me Putinin dje, ai po fliste në mënyrë figurative”

Donald Trump “po fliste në mënyrë figurative” kur tha se pati një bisedë me udhëheqësin e Kremlinit Vladimir Putin dje. Zëdhënësi i Kremlinit, Dmitry Peskov, e tha këtë, duke shpjeguar se nuk pati asnjë telefonatë midis të dyve dje. Trump “po fliste në mënyrë figurative: sot jeta është aq e mbushur me ngjarje saqë disa ditë më parë ishte si dje”, u citua Peskov nga agjencia e lajmeve Ria Novosti.