Marco Rubio do të shërbejë si Këshilltar i Sigurisë Kombëtare, thotë Trump

Presidenti i SHBA-ve, Donald Trump, ka konfirmuar përmes një statusi në median sociale “Truth” se Sekretari i Shtetit Marco Rubio do të shërbejë si Këshilltar i Sigurisë Kombëtare, pas dorëheqjes së Mike Waltz.

“Kam kënaqësinë të njoftoj se do të nominoj Mike Waltz për të qenë ambasadori i ardhshëm i Shteteve të Bashkuara në Kombet e Bashkuara”, deklaroi më tej shefi i Shtëpisë së Bardhë.

Waltz është zyrtari i parë i profilit të lartë që largohet nga administrata e Trump, e cila mbushi 100 ditë të mërkurën. Pozicioni i tij u lëkund pasi u zbulua se ai aksidentalisht kishte shtuar një gazetar nga revista The Atlantic në një grup mesazhesh ku diskutoheshin planet për sulme ushtarake ndaj rebelëve Houthi në Yemen.

Waltz tha se merrte “përgjegjësinë e plotë” për rrjedhjen e Signal-it. Michael Waltz ishte ndër emërimet e para të Trump pas zgjedhjes së tij.

Para rolit në Shtëpinë e Bardhë, ai ishte kongresmen nga distrikti i gjashtë kongresional i Florida-s nga viti 2019 deri sa dha dorëheqjen në janar për të marrë detyrën e re me Trump.

Në Kongres, ai shërbeu në komitetet e Inteligjencës, Shërbimeve të Armatosura dhe Punëve të Jashtme.

Ai më parë ishte oficer në Ushtrinë dhe Gardën Kombëtare të SHBA-ve, duke u pensionuar pas 27 vitesh me gradën kolonel.

Çështja e Signal-it

Në fund të marsit, kryeredaktori i revistës The Atlantic, Jeffrey Goldberg, raportoi se ishte shtuar aksidentalisht në një bisedë në Signal nga një përdorues i quajtur Mike Waltz.

Në këtë bisedë ishin zyrtarë të lartë të administratës, llogari të identifikuara si zëvendës presidenti JD Vance dhe Sekretari i Mbrojtjes Pete Hegseth.

Goldberg thotë se pa plane ushtarake të klasifikuara për sulme amerikane në Yemen, duke përfshirë paketa me armë, objektiva dhe orare, dy orë para se të binin bombat.

Waltz fillimisht tha se nuk e dinte se si Goldberg u përfshi në bisedë, por mori “përgjegjësinë e plotë” në një intervistë me Fox News, pasi tha se ai është personi që “ndërtoi grupin”.

Burimet i thanë partnerit amerikan të BBC-së, CBS News, dhe Guardian se Waltz ishte përpjekur të shtonte një zëdhënës të lartë në bisedën Signal kur pa dashje shtoi Goldberg në vend të tij.

Ata thanë se hetuesit zbuluan se numri i Goldberg ishte ruajtur aksidentalisht në telefonin e Waltz si një kontakt alternativ për zëdhënësin e sigurisë kombëtare Brian Hughes.

Presidenti Trump tha përfundimisht se do ta “hetonte” çështjen.