Megaoperacion ‘Anti-mafia’ në Brescia/ Shkatërrohen disa grupe kriminale në lidhje me Ndrangheta-n, mes arrestimeve dhe disa shqiptarë

Një rrjet i madh ndërkombëtar i trafikut të drogës, me qendrën kryesore në Brescia, është goditur nga policia, nën koordinimin e Drejtorisë së Antimafias. Gjatë operacionit janë ekzekutuar 45 masa sigurie, në kuadër të një hetimi të gjerë kundër trafikut të narkotikëve dhe organizatave kriminale. Prej këtyre masave, 30 të dyshuar janë dërguar në burg, 12 janë vendosur në arrest shtëpiak, ndërsa tre të tjerë janë subjekt i masave kufizuese.

Të dyshuar nga disa shtetësi dhe qytete italiane

Masat e marra prekin persona nga Italia, Shqipëria dhe nga Afrika e Veriut, të cilët jetonin në disa provinca italiane, përfshirë Brescia, Reggio Calabria, Catanzaro, Napoli, Palermo, Romë, Milano, Foggia, Cosenza, Ragusa, Trapani, Mantova, Cremona, Pavia, Chieti, Bolzano dhe Biella. Hetimet janë përqendruar te grupe kriminale të specializuara në trafikun e narkotikëve, të cilët kishin krijuar një sistem të strukturuar për importin e drogës nga Amerika e Jugut, Maroku dhe Holanda. Lëndët narkotike shpërndaheshin më pas nga Brescia në të gjithë territorin italian.

Lidhjet me krimin e organizuar

Hetimet zbuluan se një nga dy grupet kryesore të përfshira kishte lidhje të ngushta me eksponentë të organizatave mafioze si ‘Ndrangheta, Cosa Nostra, Camorra, Stidda dhe Sacra Corona Unita. Këto lidhje u mundësuan atyre të siguronin sasi të mëdha droge dhe ta shpërndanin atë përmes rrugëve të sigurta dhe të organizuara.

Operacioni dhe rëndësia e tij

Autoritetet e cilësuan këtë operacion si një goditje të rëndësishme ndaj trafikut të drogës në Itali dhe një dëshmi e angazhimit të vazhdueshëm të forcave të rendit në luftën kundër krimit të organizuar. Hetimi, i cili zgjati disa muaj, u mbështet në përdorimin e teknologjisë së avancuar për monitorimin e aktiviteteve të paligjshme dhe në bashkëpunimin mes disa strukturave të policisë dhe drejtësisë.

Ky operacion pritet të ketë një ndikim të madh në trafikun e drogës në Itali, me synimin për të shkatërruar rrjetin kriminal dhe për të rritur sigurinë publike.

Tregu i drogës në Lombardi

Rruga e drogës drejt Lombardisë është tashmë e njohur. Ajo nis nga Azia dhe, kryesisht, nga Amerika e Jugut, mbërrin në portet Italian, veçanërisht në portin e Gioia Tauro në Kalabri dhe më pas transportohet përmes autostradave drejt magazinave në Lombardi, të menaxhuara nga krimi i organizuar. Prej andej, droga shpërndahet nga mijëra shpërndarës të vegjël në sheshe, parqe dhe pranë shkollave.

Lombardia është tregu më i madh i drogës në Itali, ku kapet një e gjashta e gjithë lëndëve narkotike të sekuestruara në vend. Po ashtu, kjo krahinë regjistron numrin më të lartë të të miturve dhe shtetasve të huaj të ndaluar për shpërndarje droge.

Për rrjedhojë, është rajoni me numrin më të madh të personave në trajtim për varësi rreth 19 mijë persona, raportohet në mediat italiane.

Llojet e drogës më të përhapura në Lombardi

Vlerësimi i përdorimit të drogës është kompleks për shkak të natyrës së paligjshme të aktivitetit. Droga e lehtë, si kanabisi dhe marihuana, është më e përhapura, por autoritetet përqendrojnë vëmendjen e tyre kryesisht te drogat e forta. Në Lombardi, substanca më e kapur është kokaina, e ndjekur nga hashashi, marihuana dhe heroina.

Lombardia përballet me një problem serioz me kokainën, një nga substancat stimuluese më të fuqishme dhe të përdorura. Rreth 120 mijë banorë të këtij rajoni (1 në 50 persona) konsumojnë kokainë, dhe përdorimi i saj te të rinjtë ka tejkaluar atë të heroinës. Në nivel kombëtar, tregu i kokainës është në rritje, dhe organizatat kriminale—sidomos ‘Ndrangheta—luajnë një rol kryesor në trafikimin dhe shpërndarjen e saj.