Miku i Kosovës dhunohet nga Radoiçiç/ Sanduloviç, politikani serb që nderoi familjen Jashari

Çedomir Stojkoviç, avokat serb, nëpërmjet një postimi në platformën “X” ka thënë se ish-kandidati për president i Serbisë, Nikolla Sanduloviç, i cili dikur ka qenë bashkëpunëtor i ngushtë dhe shef i sigurimit të ish-kryeministrit serb, Zoran Gjinxhiç, është rrahur brutalisht nga shërbimet sekrete serbe në ndërtesën e Agjencisë së Sigurimit dhe Intelegjencës (BIA).

Gjithçka dyshohet se ka ndodhur për shkak të një postimi në platformën “X” dy ditë më parë, ku kreu i Partisë Republikane të Serbisë  kishte rikthyer në fokus vizitën e tij në Kompleksin Memorial “Adem Jashari” në Prekaz, duke shprehur ngushëllime për vrasjen e 50 anëtarëve të familjes Jashari nga ushtria dhe policia serbe në mars të vitit 1998.

Vetë Sanduloviç citohet të ketë thënë se në mesin e personave që kanë ushtruar dhunë, ai ka arritur të identifikojë politikanin dhe biznesmenin kontravers serb, Milan Radoiçiç, i cili ka marrë përgjegjësinë për organizimin dhe sulmin e armatosur terrorist në fshatin Banjskë të Zveçanit – komunë e banuar me shumicë serbe – në pjesën veriore të Kosovës.

Në bazë informacioneve të fundit nga familja dhe bashkëpunëtorët e afërt, politikani serb ka dalë në gjendje shumë të keqe nga spitali , ku ka qenë nën kujdesin intensiv. Ai dyshohet se është paralizuar, ndonëse nuk ka asnjë informacion zyrtar lidhur me rastin në fjalë.