Milani përgatitet për një tjetër afrim në sulm, Broja drejt kuqezinjve

Milani ka qenë ndër skuadrat më aktive në këtë merkato vere duke afruar futbollistë të shumtë, megjithatë ka ende pozicione që kanë nevojë për përforcime. Një ndër to është reparti i sulmit dhe kuqezinjtë po shohin në dy pista.

Milani po synon që të afrojë në skuadër sulmuesin e PSG-së, Hugo Ekitike i cili mund t’i kushtojë arkave të Milanit plot 20 milionë euro. “Gazzetta dello Sport” raporton se një tjetër emër në listën kuqezi, është ai i Armando Brojës i cili pritet të ketë një rikthim të vështirë në Angli me Çelsin.

Broja vjen nga një dëmtim i rëndë duke qenë se kishte këputur ligamentin fundvitin e shkuar dhe ende nuk është rikthyer në fushë. Kalimi i tij te Milani mund të jetë në formë huazimi për një sezon. Për Brojën ka interesime edhe nga Premier Liga angleze teksa marrëdhënia e mirë që klubi i Milanit ka me Çelsin, mund të jetë një plus për kalimin e sulmuesit shqiptar në “San Siro”.